Onlaın qurbandyq shalý: arnaıy saıt iske qosyldy
ASTANA. KAZINFORM — Elimizde bıyl da onlaın formatta qurbandyq shalý múmkindigi jasalady. Bul týraly Qazaqstan musylmandary dinı basqarmasynyń tóraǵasy Naýryzbaı qajy Taǵanuly aıtty.
— Bıyl da elimizde Qurban shalý onlaın jáne offlaın formatta ótedi. Dinı basqarma halyqqa qolaıly jaǵdaı jasaý maqsatynda qurban shalý rásimin qashyqtan ótkizýge arnalǵan qurban.muftyat.kz saıtyn iske qosty. Dinimizde qurbandyq shalý rásimin basqa bireýge tapsyryp, ony ókil ete alady. Eger ózi bara almasa, bir kisige ótinish jasap, qurban shalýǵa ruqsat etilgen. Demek onlaın formatta qurban shalýǵa tapsyrys bere alasyzdar, — dedi Bas múftı QMDB-da ótken baspasóz máslıhatynda.
Onyń aıtýynsha, mundaı qurbandyqtan túsken et muqtaj jandarǵa jetkiziledi.
QMBD málimetine saı, onlaın túrde qurban shalam deýshiler saıt arqyly qurbandyq malyn tańdap, Kaspi QR arqyly tólem jasaı alady. Qoı men eshkini jeke adam, al iri qara men túıe malyn bir nemese 7 adam birigip shalsa bolady.
Tapsyrys sátti ótse, uıaly telefonǵa SMS habarlama keledi. Qurbandyq shalynǵan soń onyń foto jáne beıne esebi tapsyrys berýshi kórsetken nómirge jiberiledi.
Aıta keteıik, buǵan deıin Qurban aıt merekesi naqty qaı kúni bastalatynyn habarlaǵan edik.