Onlaın qyzmet oflaın kezekke aınaldy: Atyraýda mıgranttar ETsQ ashý úshin ábigerge tústi
ATYRAÝ.KAZINFORM — Atyraý qalasyndaǵy qóshi-qon halyqqa qyzmet kórsetý bóliminiń aldynda uzyn sonar kezek qalyptasty. Shetel azamattary aldymen JSN, keıin elektrondyq sandyq qoltańba alý úshin saǵattap kútýge májbúr.
Mundaı kezek 13 sáýirden bastap baıqalǵan. Óıtkeni, sol kúnnen bastap Qazaqstanda eńbek ımmıgranttaryna jumysqa ruqsat berý jáne ony uzartý boıynsha memlekettik qyzmet HQO-larda qoljetimsiz bolyp, ótinimdi qabyldaý formaty onlaınǵa kóshti.
Shetel azamattaryna migration.enbek.kz platformasy arqyly qyzmetke qol jetkizý úshin ETsQ qajet. Al qoltańbany halyqqa qyzmet kórsetý ortalyǵyna kelip alýy kerek.
— Men keshe kezekke turyp, kire almaı kettim. Búgin 1 saǵattaı ýaqyt syrtta turyp, kezek boıynsha ishke kirdim. Óńirge jumys isteýge keldim. Jumysqa kirý úshin qyzmetimdi zańdastyrýym kerek, — dep pikir bildirdi Ózbekstan azamaty Sabyrjan Ibadlaev.
«Azamattarǵa arnalǵan úkimet» memlekettik korporatsııasynyń Atyraý oblysy boıynsha fılıalynyń kóshi-qon halyqqa qyzmet kórsetý bóliminiń ókilderiniń aıtýynsha, qaladaǵy úsh halyqqa qyzmet kórsetý ortalyǵynda da osyndaı qyzmet kórsetilip jatyr.
— Shetel azamattary ETsQ ashý úshin pasportynyń aýdarmasyn notarıaldy bekitý qajet. Keıin qoltańba alý úshin rastaýdan ótedi. Qoltańbany alǵannan keıin jumys berýshilerimen birge onlaın, ıaǵnı arnaıy saıt arqyly tapsyrady, — dedi bólimniń bas mamany Nurlan Kópbaev.
Memlekettik korporatsııasynyń Atyraý oblysy boıynsha fılıalynyń bergen aqparatyna súıensek, sáýir aıynyń 1–10-y aralyǵynda Atyraý oblysy boıynsha kóshi-qon HQO bólimderi arqyly eńbekshi ımmıgranttarǵa ruqsat berý qyzmeti boıynsha 1466 ótinish qabyldandy.
Sonymen qatar, ımmıgranttarǵa JSN berý qyzmeti boıynsha 191 ótinish tirkelgen.
Al qyzmet tolyq tsıfrlyq formatqa kóshkennen keıin, ıaǵnı 13–21 sáýir aralyǵynda ótinishter sany aıtarlyqtaı artqan. Máselen, elektrondyq tsıfrlyq qoltańba alý úshin 650 ımmıgrant júginse, ýaqytsha tirkeýge turý boıynsha 703 ótinish qabyldandy. Al JSN alý boıynsha 211 ótinish tirkeldi.
— Qazirgi ýaqytta kóshi-qon qyzmetteri ortalyǵynda shetel azamattarynyń, onyń ishinde kórshiles memleketterden ýaqytsha jáne maýsymdyq jumystarǵa keletin eńbekshi ımmıgranttardyń aǵymynyń maýsymdyq artýy baıqalady. Bul úrdis jyl saıyn qaıtalanyp, osy kezeńde eńbek kóshi-qonynyń jandanýymen baılanysty. Bul ortalyqta bir mezette bolatyn kelýshiler sanynyń artýyna áser etedi, — dep málimdedi «Azamattarǵa arnalǵan úkimet» memlekettik korporatsııasy» KeAQ AOBF.
Buǵan deıin Almaty qalasyndaǵy mamandandyrylǵan halyqqa qyzmet kórsetý ortalyqtarynda jeke menedjer qyzmetin qoldanatyndar kóbeıgenin jazǵan edik.
