Onlaın-keńeste áleýmettik jeliniń qoǵamdyq sanaǵa áseri talqylandy

NUR-SULTAN. QazAqparat – «Rýhanı jańǵyrý» baǵdarlamasy aıasynda áleýmettik jelilerde ulttyq salt-dástúrge qatysty málimetter taratylyp otyrady. Bul týraly búgin QR Aqparat jáne qoǵamdyq damý mınıstrligi «Rýhanı jańǵyrý» baǵdarlamasyn úılestirý departamentiniń dırektory Nurlan Kúntýovtyń tóraǵalyǵymen ótken onlaın-keńeste aıtyldy, dep habarlaıdy QazAqparat tilshisi.

«Áleýmettik jeli jáne onyń qoǵamdyq sanaǵa áseri» taqyrybyndaǵy keńeske jergilikti atqarýshy organdardyń, baǵdarlamanyń óńirlik jobalyq keńseleriniń jáne Qazaqstandyq qoǵamdyq damý ınstıtýtynyń ókilderi qatysty.

Búgingi tańda, «Rýhanı jańǵyrý» baǵdarlamasyn iske asyrýdaǵy ózekti máselelerdiń biri – áleýmettik jelimen jumys isteý, onyń ishinde baǵdarlamany áleýmettik jelilerde nasıhattaý boıynsha jumysty qamtý bolyp tabylady.

Internet-keńistik – zamanaýı qoǵamdyq ortany qalyptastyrýdyń negizgi quraldarynyń biri, qoǵamdyq sanany jańǵyrtý baǵdarlamasy boıynsha aqparattyq jumys tetikterin qurýǵa arnalǵan jaqsy dıalog alańy.

«Rýhanı jańǵyrý» óńirlik keńseleriniń resmı paraqshalarynda, ıaǵnı Instagram, YouTube, Facebook áleýmettik jelilerinde materıaldardy jarııalaý arnaıy aıdarlar boıynsha júrgiziledi. Olar: «Rýhanı Life», «Ulttyq mádenıettiń sheberi», «Ulttyq ónerdiń sheberi», «Ólketaný», «Ulttyq oıyn» jáne taǵy basqalary.

«Mysaly: «Ulttyq oıyn» aıdarynda qalyń jurtshylyqqa umytylyp qalǵan ejelgi ulttyq oıyndar týraly materıaldar jarııalanady. Atalǵan aıdardyń maqsaty – «Ulttyq biregeılikti saqtaý» tujyrymdamalyq baǵytynyń maqsattary men mindetterine sáıkes ulttyq sport túrlerin jańǵyrtý jáne nasıhattaý.

Instagram, Facebook áleýmettik jelilerinde jarııalanatyn materıaldardyń mazmuny men ıdeıalyq baǵyttylyǵy kontenttiń formatyn edáýir keńeıtýge múmkindik berdi», - delingen QR AQDM aqparatynda.