Onlaın kazınony jarnamalaǵandardyń tabysy tárkilenip, eki ese aıyppul salynýy múmkin

ASTANA. KAZINFORM — Onlaın kazınony jarnamalaǵandardy qylmystyq jaýapqa tartý máselesi talaıdan berý aıtylyp júr. Qarjylyq monıtorıng agenttigi tóraǵasynyń orynbasary Qaırat Bıjanov Senat depýtattarynyń saýalyna joldaǵan jaýapta onlaın kazınolardy jarnamalaǵandar qandaı jaǵdaıda qylmystyq jaýapkershilikke tartylatynyn aıtqan. 

— Agenttik zańsyz oıyn bıznesin jarnamalaǵandardy qylmystyq jaýapkershilikke tartý (qarjy pıramıdasyn jarnamalaǵany úshin qoldanylatyn jaza sııaqty) jáne ákimshilik jaýapkershilikti qatańdatýǵa baǵyttalǵan túzetýler ázirlep, Ádilet mınıstrligine joldady (atalǵan túzetýlerdi Ádilet mınıstrliginiń janyndaǵy jumys tobynda talqylaý kózdelip otyr). Naqtyraq aıtsaq, Ákimshilik quqyq buzý týraly kodekske azań buzǵandarǵa jarnamadan túsken tabysty tárkilep, sonyń 200%-dan 400%-ǵa deıin (qaıtalap zań buzǵan jaǵdaıda) aıyppul salatyn arnaıy norma (455-1-bap) engizý usynylyp otyr, — dep jazady agenttik basshysynyń orynbasary.

Al Qylmystyq kodekske 307-1-bapty engizý usynylyp otyr.

— Bul bap boıynsha 1000 aılyq eseptik kórsetkish (3 mln 932 myń teńge) kóleminde kiris ákelgen jarnama áreketi azamattarǵa 1000 AEK kóleminde, memleketke 5000 AEK (19 mln 660 myń teńge) kóleminde iri shyǵyn keltirse nemese ólim nemese óz-ózine qol jumsaý áreketterine ákep soqtyrsa, qylmystyq jaýapkershilik júkteledi.

Osy baptyń ekinshi bóliginde jarnama salasyndaǵy zań buzý faktisin toptasyp jasaý, birneshe márte jasaý, qyzmet babyn paıdalanyp jasaý sııaqty áreketterge bólek sıpattar ústeý usynylyp otyr. Sondaı-aq, 5000 AEK mólsherinde asa iri kiris ákelgen zańsyzdyqtarǵa jaýapkershilik engizý kózdelgen.

Atalǵan túzetýlerdiń tujyrymdamalaryn Prezıdent ákimshiligi qoldap, agenttik pen Bas prokýratýraǵa, Ádilet jáne ishki ister mınıstrlikterine jyl aıaǵyna deıin pysyqtaý tapsyryldy, — dep jazady Qaırat Bıjanov.

Buǵan deıin de onlaın kazınony jarnamalaǵan blogerler qylmystyq jazaǵa tartylýy múmkin ekenin jazǵan edik.