Onlaın kazınony jarnamalaǵan blogerler qylmystyq jazaǵa tartylýy múmkin

ASTANA. KAZINFORM – Qarjylyq monıtorıng agenttigi tóraǵasynyń orynbasary Jeńis Elemesov blogerlerdiń qyzmetin tekserý jumystaryna túsinik berdi.

- Blogerlerge qatysty aýqymdy jumys júrip jatyr. Onlaın kazınony jarnamalaǵan 34 blogerdiń áreketin zerttedik. Qazaqstan aýmaǵynda zańsyz qyzmet etken kazınolarǵa tosqaýyl qoıdyq. Alaıda onlaın kazınolar shetelde iske qosylady da, elimizdegi blogerler arqyly jarnama jasaıdy. Osynyń saldarynan turǵyndar qumar oıyndardyń shyrmaýyna túsedi. Sondyqtan blogerlerge qatysty Mádenıet mınıstrligine tıisti aqparatty joldadyq. Olardyń 11-i ákimshilik jaýapkershilikke tartyldy, al qalǵandaryna qatysty jaza qarastyrylyp jatyr, - dedi J.Elemesov Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, eger blogerler osy kazınolardy uıymdastyrý nemese kiristi bólisý is-sharalaryna qatysty bolsa, onda qylmystyq iste sybaılas retinde qarastyrylady.

- Al jarnamalaýǵa ákimshilik jaza eskerilgen. Degenmen, jazany qatańdatý bastamasyn kóterdik, ıaǵnı onlaın kazınony jarnamalaǵany úshin qylmystyq jazany usyndyq, - dedi agenttik ókili.

Eske salsaq, jaqynda qumar oıyndardy nasıhattaýǵa qatysy bar 34 blogerdiń esimi ataldy.