Onlaın-kazınolardy jarnamalaıtyn blogerlerge qylmystyq jaýapkershilik engizý qajet - senator
ASTANA. KAZINFORM – Búgin Senattyń jalpy otyrysynda senator Gennadıı Shıpovskıh Qarjylyq monıtorıng agenttiginiń tóraǵasy Janat Elımanovqa depýtattyq saýal joldap, onlaın-kazıno jarnamalaıtyn blogerlerge jazany kúsheıtýdi usyndy.
Depýtattyń aıtýynsha, sońǵy eki jarym jylda elimizde 205 astyrtyn kazıno jabylyp, 224 tulǵa qylmystyq jaýapkershilikke tartylǵan. Blogerlerdiń zańsyz qyzmetterdi ilgeriletýge qatysýy erekshe alańdaýshylyq týǵyzady. Tek bıylǵy jyldyń ózinde 34 bloger onlaın-kazıno jarnamalaǵany anyqtalǵan. Onyń 11-i ákimshilik jaýapkershilikke tartylyp, 23-i boıynsha materıaldar Mádenıet jáne aqparat mınıstrligine joldanǵan. Olardyń ishinde keıbiri birneshe ret ákimshilik jazaǵa tartylsa da, zańsyz áreketin jalǵastyrýda. Sebebi qarapaıym aıyppuldar olardy toqtatýǵa jetkiliksiz, zańsyz jarnamadan túsetin mıllıondaǵan paıda tólengen ákimshilik jazadan áldeqaıda asyp túsedi.
- Áleýmettik jeliler keńistiginde keıbir blogerlerdiń zańsyz jeńil aqsha tabý úrdisi kúrt kóbeıip ketti. Ásirese, olardyń onlaın-kazıno, jalǵan utystar, ıaǵnı gıvtar, kýrstar jáne kúmándi qarjy aınalymdaryn nasıhattaýy keńinen etek alyp otyr. Bul qubylys halyqtyń áleýmettik-ekonomıkalyq ál-aýqatyna aıtarlyqtaı zııan tıgizip, jastar arasynda qumar oıynǵa táýeldilik, otbasylyq daǵdarys jáne kóleńkeli qarjy aınalymynyń ósýine ákelýde, - dep atap ótti Gennadıı Shıpovskıh.
Onyń paıymynsha, jalǵan gıvtar men ótirik kýrstar qazirgi tańda áleýmettik jelilerde jıi kezdesetin aldaý tásilderiniń biri bolyp otyr. Kóp jaǵdaıda olar adamdardy jeńil jolmen paıda tabýǵa nemese jyldam jetistikke jetýge ýáde berip, senimin teris paıdalanady. Jalǵan gıvtar qymbat syılyqtar nemese qarjylaı utystar ýáde etip, qatysýshylardan túrli sharttardy oryndaý talap etiledi. Biraq sońynda ýáde etilgen syılyqtar berilmeı, tek paraqsha ıeleriniń jazylýshylary artady.
- Qazirgi ýaqytta zańsyz onlaın-kazıno jáne kúmándi gıvterdi jarnamalaǵan blogerlerge qoldanylyp jatqan ákimshilik aıyppuldardan bólek, qylmystyq jaýapkershilik tetigin tolyqqandy iske qosýdy usynamyz. Áleýmettik jelilerde jıi uıymdastyrylatyn utys oıyndary men gıvterdiń zańdylyǵyn tekserý úshin arnaıy monıtorıng júıesin engizý kerek.
Zańsyz jarnamany taratýshylarmen qatar, osy qyzmetke deldaldyq jasap otyrǵan tólem uıymdary men jarnamalyq agenttikterdiń qyzmetine monıtorıng júrgizý kerek, - dedi Gennadıı Shıpovskıh.
Búgin Qarjylyq monıtorıng agenttigi tóraǵasynyń orynbasary Jeńis Elemesov blogerlerdiń qyzmetin tekserý jumystaryna túsinik bergen edi.