Onlaın-ekskýrsııalar: Qandaı mýzeılerdi úıden shyqpaı tamashalaýǵa bolady
«Búgingi tańda Bozoq, Saraıshyq, Saýran jáne Otyrar qalashyqtary, sondaı-aq Berel jáne Esik qorǵandary sııaqty tarıhı-mádenı oryndarǵa, mýzeıler men mýzeı-qoryqtarǵa onlaın rejımje ekskýrsııa jasaýǵa bolady. Atalmysh oryndardyń saıttarynda 3D formatyndaǵy ekskýrsııa, onlaın-serýen rejımi, sondaı-aq beınerolıkter, beıneekskýrsııalar, onlaın dárister, beınesabaqtar jáne taǵy basqa is-sharalarqamtylǵan», - dedi Aqtoty Raıymqulova OKQ-da onlaın rejımde ótken baspasóz máslıhatynda.
Mınıstrdiń aıtýynsha máselen, mýzeı-qoryqtar qysqa ýaqyttyń ishinde 100 myńnan astam adamdy qamtıtyn 150-den astam onlaın-shara ótkizip úlgergen.
«Erekshe toqtalatyn jobalardyń biri - Á. Qasteev atyndaǵy Memlekettik óner galereıasy ázirlegen estý qabileti buzylǵan azamattarǵa arnalǵan arnaıy beıneekskýrsııalar. Bul shara elimizdegi 18 myńnan astam estý qabileti buzylǵan adam úshin keremet múmkindik týdyrdy desek te bolady. Sondaı-aq, zaǵıp jáne nashar kóretin azamattarǵa arnalǵan kitaphana da tek karantın keziniń ózinde 25-ten astam shyǵarmany áleýmettik jelilerge ornalastyrdy. Braıl shrıfti boıynsha 130-dan astam kitap, aýdıokitap, sonyń ishinde Uly Abaıdyń shyǵarmalaryn taratty», - deıdi mınıstr.
Sonymen qatar elimizde balalarǵa arnalǵan «Ónerli óren» respýblıkalyq onlaın konkýrsy uıymdastyrylǵan. Oǵan qatysýǵa 500-ge jýyq ótinish túsken.
«Bul rette klassıkterdiń, sonyń ishinde Uly Abaıdyń eń úzdik shyǵarmalary óte tanymal ekenin aıta ketý kerek. Qazirgi ýaqytta áleýmettik jelide jalǵasyp jatqan konkýrsty bir ýaqytta 28 myń kórermen tamashalaıdy. Balalardyń sheberligin kásibı ártister, aqyndar baǵalaıdy», - dep túıdi Aqtoty Raıymqulova.
