Onlaın alaıaqtyqtan kelgen shyǵyndardy bankter ózderi óteýi tıis - Rınat Zaıytov
ASTANA. KAZINFORM – Májilis depýtaty Rınat Zaıytov onlaın alaıaqtyq máselesin kóterip, Bas prokýror Berik Asylovtyń atyna saýal joldady.
- Jańa kezeńge jyldam beıimdelgen «jylpos» alaıaqtar kún saıyn qorǵansyz halyqtyń shotyndaǵy aqshasyn urlap qana qoımaı, myńdaǵan adamnyń atyna syrttaı nesıe rásimdep, onsyz da zorǵa júrgen halyqty zarlatyp jatyr. Ókinishke qaraı, jazyqsyz jem bolǵan jandardyń jaǵdaıyn uǵyp jatqan Úkimet te, bankter de kórinbeıdi. Al kóptegen alaıaqtyq jasaý faktisinde ne bank, ne jergilikti organ ókilderiniń qatysýymen bolǵany dáleldengen. Mysaly, Qaraǵandy qalasynyń jumyspen qamtý jáne áleýmettik qorǵaý basqarmasynyń qyzmetkeri múgedektigi bar, zeınettegi jıyny 90 adamnyń shotyndaǵy aqshany jymqyrǵan. Taldyqorǵan, Astana, Almaty qalalarynda da bank qyzmetkerleriniń azamattardyń jeke málimetine qol jetkizýge kómekteskeni jóninde faktiler anyqtalǵan, - dedi Rınat Zaıytov.
Onyń aıtýynsha, el kóleminde bıylǵy qańtar, aqpan aılarynyń ózinde ǵana kıberalaıaqtyqpen bank qyzmetkerlerine qatysty Qylmystyq kodekstiń 250-baby (Ókilettikterdi teris paıdalaný) boıynsha – 15 is, al Qylmystyq kodeksiniń 254-baby (Mindetterine adal qaramaý) boıynsha 17 is qozǵalǵan.
- Bir túsiniksizi - bul kıberqylmystan qorǵaýǵa, azamattardyń shottarynyń qaýipsizdigin saqtaýǵa mindetti bankterge eshqandaı jaýapkershilik júktelmegen. Osy ádiletti me?! Biz olaı oılamaımyz. Aqylǵa salsaq, alaıaqqa jem bolyp, bankke saqtaǵan aqshasynan aırylyp, moınyna joq jerden nesıe júktelip, jyǵylǵan jandarǵa judyryq bolyp bankter olardyń shottaryn da buǵattaıdy. Bul – halyqqa jasalǵan orynsyz qııanat qoı. Sál qysylsa memleketten mıllıardtap qarjyny alatyn, oıyna kelgen paıyzdyń ólshemin taǵaıyndap, óz qatelikterine jaýap berýden jaltaratyn qaıyrymsyz bankter qashanǵa deıin taırańdamaq? Naqaqtan naqaq qaryzǵa batqan halyqty qorǵaıtyn ýaqyt keldi ǵoı, - dedi depýtat.
Osy oraıda ol joǵaryda aıtylǵandardyń negizinde myna usynystaryn jarııalady.
- Ekinshi deńgeılik bankter kıberalaıaqtardyń qylmystyq is-áreketterinen zardap shekken azamattardyń bank shottaryn buǵattan shyǵarýdy jáne de bul sanattaǵy adamdardyń shottaryn buǵattaýǵa tyıym salý sharalaryn qarastyrýy kerek. Sonymen qatar shottaryndaǵy qarjynyń saqtalýyna jaýapty bankter bolǵandyqtan, kıberalaıaqtyqtan kelgen zardap pen barlyq shyǵyndy bankter óz tarapynan óteý mindetin júkteýdi usynamyz, - dedi Rınat Zaıytov.
Budan buryn habarlanǵandaı, Ulttyq bank 1,5 mlrd teńgeniń alaıaqtyqqa tán tranzaktsııalaryn buǵattady.