Onlaın-alaıaqtyq: turǵyndar páterleri men kólikterinen aıyrylyp jatyr

PETROPAVL. KAZINFORM – Elimizde onlaın-alaıaqtyqtyń jańa tásili beleń alyp barady. Qylmyskerlerler halyqtyń baspanasyna aýyz saldy.

Soltústik Qazaqstan oblystyq advokattar alqasynyń múshesi Elena Ignatenkonyń aıtýynsha, onlaın-alaıaqtardan zardap shegip, baspanasynan, kóliginen aıyrylý faktileri Almatyda, Rýdnyıda, Petropavlda tirkelgen.

- Alaıaq habarlasyp, «sizdiń kóligińizdi nemese páterińizdi sataıyn dep jatyr» deıdi. Sosyn satylatyn baspana týraly saıtqa kirip, kóz jetkizýdi suraıdy. Árıne, aldyn ala ol jerge habarlandyrý ornalastyrylady. Sosyn bul satyp alý júzege aspaýy úshin «jalǵan mámile» jasaý kerektigi aıtylady. Páter ıesi kelisedi, óz aıaǵymen notarıýsqa baryp, qolyn qoıady. Tipti keı jaǵdaıda zardap shegýshige «bul qupııa operatsııa, qylmyskerlerdi ustaý úshin eshkimge aıtpaýyńyz kerek» dep qolhat alǵan kezder de bolǵan. Keıin alaıaqtar seziktenbeýi úshin ony syılyq retinde bezendirip, «quqyq qorǵaý organy qyzmetkerine» nemese taǵy basqa qyzmet «ókilderine» beredi, - deıdi Elena Ignatenko.

Advokattyń aıtýynsha, oǵan Petropavlda ǵana osylaısha baspanasynan aıyrylǵan úsh adam kómek surap kelgen.

- Bireýi osy oqıǵadan keıin depressııaǵa túsip, basqa qalaǵa qyzyna ketti. Barlyǵyna qolyn siltep, tezirek umytqysy keledi, bul ispen aınalyspaıtynyn aıtty. Ekinshisi – oblys ortalyǵyndaǵy pedagogterdiń biri. Ol da osy tásil boıynsha alaıaqtardyń quryǵyna túsip, eki baspanasynan aıyryldy. Áıel «jalǵan mámile» jasaǵannan keıin, alaıaqtardyń aıtýy boıynsha aqshany qorapqa salǵan, ádemilep bezendirip, qaǵazǵa orap, syrtyna oıynshyq qonjyqty baılaǵan. Sosyn ol qorapty kýrerge bergen. Al páterler birden satylymǵa shyǵarylǵan. Onyń bireýin qaıtarý múmkin boldy. Al ekinshisin zańdy tulǵalar satyp alǵan eken, olar áıelge qaıtys bolǵansha deıin turýǵa ruqsat berdi, - deıdi Elena Ignatenko.

Qorǵaýshynyń aıtýynsha, kýrerdi, jas jigitti páterdiń aqshasy salynǵan qorappen Astanada ustady. Ol qoraptyń ishinde ne bolǵanyn bilmegen, syılyq apara jatyrmyn dep oılaǵan.

- Bul da alaıaqtardyń bir tásili. Kýrerlerdi ózderiniń qylmysyna tartý. Bireýge syılyq apara jatyrmyn dep oılaıdy.

Al Rýdnyıda áıel 200 mln teńgesinen aıyryldy. Ol bes kún boıy qylmyskerlerdiń psıhologııalyq qysymynda bolǵan, - deıdi advokat.

Buǵan deıin Petropavlda alaıaqtardan zardap shekken 66 jastaǵy áıeldiń 27 mln teńgesin polıtseılerdiń qaıtaryp alýǵa kómekteskenin jazǵan edik.

Sondaı-aq, onlaın-alaıaqtardan aldanǵan jaǵdaıda qalaı áreket etý qajettigin advokat aıtyp berdi.