Onkologııalyq kómekti damytýdyń besjyldyq baǵdarlamasyna 207 mlrd. teńge jumsaý kózdeledi

Búgin Májilistegi «Nur Otan» HDP fraktsııasy  janyndaǵy Áleýmettik keńestiń otyrysynda «Qazaqstan Respýblıkasynda onkologııalyq kómekti damytý týraly» baǵdarlama jobasyn tanystyrý barysynda Densaýlyq saqtaý vıtse-mınıstri Erik Baıjúnisov osylaı málim etti.  

Vıtse-mınıstrdiń aıtýynsha, 2012-2016 jyldardy qamtıtyn baǵdarlama sheńberinde 207 mlrd. teńge jumsaý qarastyrylǵan. Bul qarajattyń basym bóligi jańa onkologııalyq ortalyq salýǵa jáne Qostanaı, Qyzylorda oblystarynda onkologııalyq dıspanser korpýstarynyń qurylysyna jumsalatyny kózdelgen.

«Baǵdarlama aıasynda barlyq onkologııalyq kabınetter jaraqtandyrylady, emhanalar dıagnostıkalyq qajetti qondyrǵylarǵa, mamandarǵa ıe bolady. Al baǵdarlamadan kútiletin túpki nátıjege keletin bolsaq, 2016 jylǵa qaraı onkologııalyq aýrýlardan bolatyn ólim-jitim 15 paıyzǵa tómendeıdi. Aýrýdy erte bastan anyqtaý úlesi 53 paıyzǵa artady. Sondaı-aq, skrınıng baǵdarlamasymen halyqty qamtý deńgeıi 92 paıyzǵa jetedi», - deıdi vıtse-mınıstr.