Onkologııalyq aýrýlarǵa áleýmettik qoldaý qajet - Bas onkolog Q.Nurǵazıev
ASTANA. 6 naýryz. QazAqparat - «Onkologııalyq aýrýlarǵa áleýmettik qoldaý qajet», - deıdi Densaýlyq saqtaý mınıstrliginiń shtattan tys Bas onkology Qýanysh Nurǵazıev.
Bul týraly ol búgin Parlament Májilisinde «Nur Otan» HDP fraktsııasy janyndaǵy Áleýmettik keńes otyrysynda «Qazaqstan Respýblıkasynda onkologııalyq kómekti damytý týraly» salalyq baǵdarlama jobasynyń tanystyrylymy barysynda jýrnalısterge bergen suhbatynda aıtty.
Q.Nurǵazıevtiń aıtýynsha, onkologııalyq aýrýlar neǵurlym asqynǵan saıyn ony emdeý de soǵurlym qymbattaı bermek. Ol árıne memleket úshin de syrqat adamnyń ózi úshin de tipti dáriger úshin de qıyn ári qymbat bolady. Sondyqtan qalyń kópshilikti osy aýrýdyń aldyn alýǵa úıretý kerek. Ár azamat óziniń densaýlyǵyna birinshi kezekte ózi jaýapty. Qoǵam ókilderi aldyn ala dárigerge qaralyp, densaýlyq jaǵdaıyn udaıy teksertip otyrý kerek.
«Búgin bizdiń halyq qalaýlylarynyń aldyna usynyp otyrǵan baǵdarlamamyz Dúnıejúzilik densaýlyq saqtaý uıymynyń talaptary negizinde daıyndalǵan. Birinshiden ol profılaktıkalyq jumystar. ıAǵnı adamnyń tamaqtanýynan bastap, qalaı júrip-turý kerektigi, qandaı ádetterden saqtanýy kerek degen sııaqty keń aýqymdy máselelerdi qamtıdy. Ekinshi baǵyt naýqastyń aýrýyn taýyp, ony júıeli emdeýmen baılanysty. Úshinshi baǵyt joǵary tehnologııaly qurylǵylardyń kómegimen emdeýge baılanysty»,- dedi Bas onkolog.
Onyń sózinshe, qazirgi tańda elimizde onkologııalyq naýqastardy emdeıtin zamanǵa saı qurylǵylar sany óte az. «Sondyqtan bul máselege úkimettiń de jergilikti ákimdikterdiń de barynsha kóńil bólgenderi lázim. Áıtpese eldegi onkologııalyq aýrýmen naýqastanǵandar osydan 30-40 jyl buryn salynǵan ǵımarattarda emdelýde. Osy máselelerdiń barlyǵyn sheshý kerek. Buǵan qosa bizge osy indet túrlerimen kúresetin dáriger mamandardyń biliktilikterin de jetildirgen jón. Óıtkeni onkologııa degen úlken júıe. Ony jalǵaz onkologtyń kúshimen emdeı almaısyz. Bul iske hımııa terapevti, hırýrg, radıolog, medıtsına fızıgi men hımıgi sııaqty mamandar da atsalysýlary kerek. Bul mamandardyń barlyǵynyń biliktiligi joǵary bolǵany durys. Osy turǵydan kelgende biz qazir kásibı mamandarǵa da zárýmiz»,-dedi Bas onkolog.
Onyń derekterine súıensek, 2011 jyly elimizde 30 myń 299 naýqas anyqtaldy. Al dıspanserlik esepte tirkelgender sany 148 myń 861 bolady.
