Onkologııalyq aýrýlardyń ishinde sút bezi qaterli isik aýrýy birinshi orynda tur

Odan keıingi  orynda - ókpe qaterli isigi (10.4 paıyz),  úshinshi oryndy asqazan qaterli isigi alyp otyr (7,9 paıyz). Bul týraly búgin «Onkologııalyq aýrýlardyń aldyn alý ádisi retinde 2011 jylǵy Astana qalasy turǵyndarynyń skrınıngtik zertteýleriniń qorytyndysy» atty baspasóz máslıhaty barysynda málim boldy.

Qazaqstan Respýblıkasy Prezıdenti N. Nazarbaevtyń aǵymdaǵy jylǵy Joldaýynda júktelgen mindetterdi júzege asyrý jáne  Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyn júzege asyrý sheńberinde Astanada onkologııalyq aýrýlardyń aldyn alý ádisi retinde elorda turǵyndaryna  skrınıngtik zertteýler júrgizilgen bolatyn. Sanaq málimetterine sáıkes, gematologııalyq jáne onkologııalyq aýrýlar Qazaqstanda bir jastan asatyn balalar arasyndaǵy ólim, oqys týyndaıtyn qater jaǵdaılar, ózine-ózi qol jumsaý, jaraqattar men avtokólik apattarynan keıingi ekinshi orynda. Sonymen birge, ólim-jitimniń eń kóp jaǵdaıy, ásirese, er adamdarda 61 jastan asqandarda, qaterli isik aýrýynyń 3-4 kezeńindegi adamdarda baıqalady.

Jalpy DDU sarapshylarynyń baǵalaýy boıynsha, 30 paıyz jaǵdaıda qaterli isiktiń paıda bolý qaýpin durys tamaqtaný, belsendi ómir saltyn ustaný jáne shylym shegýden bas tartý esebinen aldyn alýǵa bolady. Budan bólek, mamandar terige ýltrakúlgin sáýlelerdiń áserin tómendetý maqsatynda solıarıı qabyldaý sanyn azaıtý kerek.

«Onkologııalyq aýrýlarmen kúres barysynda erte kezde jasalatyn dıagnostıkany jetildirý isi asa mańyzdy. Alǵashqy medıtsınalyq kómekke júginýdiń birqatar jaǵdaılarynda aýrýlar asqynǵan jaǵdaıda kezdesedi. Kóptegen isikter 25-40 jasta, al keıbireýleri balalyq shaqta qalyptasady. Biraq turǵyndardyń kóptep qaralýy - basty alǵyshart emes, skrınıngtik baǵdarlamalardyń jumysynyń tıimdiligin arttyrý qajet», - deıdi mamandar.