Onkologııada dári-dármek qaýipsizdigin arttyratyn jańa júıe engizildi
ALMATY. KAZINFORM – Almaty onkologııa ortalyǵynda robottandyrylǵan dárihana kesheni jáne dárilik preparattardy jabyq germetıkalyq jaǵdaıda suıyltý júıesi engizildi.
Jańa tehnologııa dárilik zattarmen qamtamasyz etýdiń negizgi kezeńderin – preparattardy qabyldaý men saqtaýdan bastap, olardy suıyltý jáne patsıentterge berýge deıingi protsesterdi avtomattandyrýǵa múmkindik beredi.
Kodtardyń kómegimen árbir dárilik preparatqa jeke tsıfrlyq sáıkestendirý beriledi, al onymen jasalǵan árbir áreket júıede tirkeledi. Osylaısha mamandar preparattyń dárihana keshenine kelip túsken sátinen bastap patsıentke berilgenge deıingi búkil qozǵalysyn qadaǵalaı alady.
Onkologııalyq qyzmet úshin bul asa mańyzdy. Óıtkeni dárilik zattarmen qamtamasyz etýdiń dáldigi men qaýipsizdigi emdeý sapasymen tikeleı baılanysty.
Bul rette tsıfrlandyrý Almaty qalasynda onkologııalyq kómektiń tıimdiligi aıtarlyqtaı artyp otyrǵan kezeńde júzege asyrylýda. Búginde Almaty onkologııa ortalyǵynda qala boıynsha dıspanserlik esepte 38 myńnan astam patsıent tur, al jyl saıyn 27 myńnan astam adam medıtsınalyq kómek alady. Sońǵy segiz jyldyń ishinde kórsetilgen emdeý qyzmetteriniń kólemi 2,5 esege ósti.
Sonymen qatar bes jyldyq ómir súrý kórsetkishi de 46%-dan 75%-ǵa deıin artty.
Júıe dárilik preparattardyń dozasyn dál saqtaýǵa, qateler qaýpin azaıtýǵa jáne dári-dármekterdi daıyndaý protsesin tolyq baqylaýǵa múmkindik beredi.
Aıta ketelik elimizde dári-dármek óndirisi artyp, jańa 494 preparat shyǵarylmaq.
