Onkologııa jáne júktilik: elordada ózekti medıtsınalyq máseleler kóterildi
ASTANA. KAZINFORM — Elordadaǵy Kópbeıindi medıtsınalyq ortalyq bazasynda onkologııalyq aýrýlar men áıelder densaýlyǵyna qatysty halyqaralyq ǵylymı-praktıkalyq konferentsııa ótti. Bul týraly Astana ákimdiginiń resmı saıty jazdy.
Konferentsııa onlaın jáne oflaın formatta uıymdastyrylyp, oǵan Qazaqstannyń jetekshi mamandary men alys-jaqyn sheteldegi onkologtar qatysty.
— Kezdesý barysynda onkologııalyq aýrýlardy erte anyqtaý, zamanaýı emdeý tásilderi, aldyn alý sharalary jáne júktilik kezindegi qaterli isik sııaqty ózekti máseleler qaraldy. Mamandardyń aıtýynsha, júkti áıelderdegi onkologııalyq aýrýlardy dıagnostıkalaý men emdeý jeke tásildi jáne pánaralyq yntymaqtastyqty qajet etedi, — delingen habarlamada.
Sondaı-aq onkologııa, mammologııa, gınekologııa, endokrınologııa jáne reprodýktologııa salalaryndaǵy qazirgi medıtsınalyq jetistikter men tájirıbeler talqylandy.
Ásirese patsıentterdiń reprodýktıvti densaýlyǵyn saqtaý jáne emdeý taktıkasyn durys tańdaý máselesine basymdyq berildi.
Sarapshylar onkologııalyq aýrýlardy ýaqytyly anyqtaý qazirgi medıtsınanyń negizgi mindetteriniń biri ekenin atap ótti. Júktilik pen onkologııanyń qatar júrýi búginde tek medıtsınalyq emes, áleýmettik mańyzy bar másele retinde qarastyrylatyny aıtyldy.
Al qaterli isikpen kúreste jasyl dáliz qalaı kómektesetinin myna siltemeden oqyńyz.
