Onkologııa, týberkýlez, ınfarkt: MÁMS júıesine qandaı ózgerister engizildi

ASTANA. KAZINFORM – Áleýmettik medıtsınalyq saqtandyrý qorynyń Astana fılıalynyń mamandary Alǵashqy medıtsınalyq-sanıtarııalyq kómek kórsetý ortalyǵynda MÁMS-ke qatysty jańa ózgeristerdi keńinen túsindirdi. Bul týraly Astana qalasy ákimdiginiń baspasóz qyzmeti habarlady. 

Mamandardyń aıtýynsha, endi sońǵy bes jylda turaqty tólem jasaǵan azamattar ýaqytsha jarna tólemeı qalsa da, saqtandyrylǵan mártebesin alty aıǵa deıin saqtap qala alady. Buǵan deıin bul merzim úsh aımen shektelgen edi. Atalǵan azamattardy qıyn jaǵdaıda da medıtsınalyq kómeksiz qaldyrmaýǵa baǵyttalǵan qadam.

Sonymen qatar saqtandyrý mártebesine qaramastan tegin kórsetiletin qyzmetterdiń tizimi keńeıdi. Onkologııalyq aýrýlarǵa skrınıng, týberkýlez, AITV, vırýsty gepatıt, baýyr tsırrozy, onkologııalyq, psıhıkalyq, sırek kezdesetin aýrýlar, ınfarkt pen ınsýlt boıynsha keńes berý men dıagnostıka tegin kórsetiledi.

— 2026 jyldan bastap MÁMS bazalyq paketi jańa qyzmettermen tolyqtyrylady. Atap aıtqanda, ambýlatorııalyq dıalız, 1-2 toptaǵy sozylmaly aýrýlarǵa dınamıkalyq baqylaý jáne keńes berý, ambýlatorııalyq dári-dármekpen qamtamasyz etý jáne josparly statsıonarlyq jáne statsıonardy almastyratyn kómek, — deıdi Áleýmettik medıtsınalyq saqtandyrý qorynyń Astana fılıalynyń bólim jetekshisi Shynar Satylhanqyzy.

Aıta ketelik dárigerlerge arnalǵan JI-assıstent jumys isteıtin bolady.