Óńirlik jumyspen qamtý kartasy ázirlenedi - Dúısenova

ASTANA. QazAqparat – 2023 jyldyń 15 qańtaryna deıin óńirlik jumyspen qamtý kartasy ázirlenedi. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

Mınıstrdiń aıtýynsha, 7 jylda 3 mln-nan astam azamatty, onyń ishinde 2,3 mln jasty jumysqa ornalastyrýdy qamtamasyz etý úshin jergilikti ákimdiktermen birlesip, óńirlik jumyspen qamtý kartasy 2023 jyldyń 15 qańtaryna deıin ázirlenedi. Kartada ár óńirdiń jyldyq jumyspen qamtý ındıkatorlary belgilenedi.

«Árbir ashylǵan jumys orny boıynsha monıtorıng Elektrondyq eńbek bırjasynda júrgizilip, zeınetaqy jarnalary men eńbek sharttary arqyly rastalady. Jumys kúshiniń utqyrlyǵyn arttyrý maqsatynda jumys kúshiniń tapshylyǵy bar óńirlerge azamattardy tartýdyń jańa mehanızmderi júzege asyrylady. Mundaǵy negizgi shart – jumys ornynyń bolýy men baspanamen qamtamasyz etý múmkindigi. Bul is-sharalarǵa azamattardyń qoljetimdiligin arttyrý jáne óz ýaqytynda aqparattandyrý maqsatynda óńirlerde mobıldi jumyspen qamtý, jyljymaly jármeńke jáne jyljymaly oqý jobalaryn iske asyrmaqpyz», – dedi Tamara Dúısenova.