Óńirlik jergilikti ózin-ózi basqarýda genderlik teńdikke de nazar aýdarý qajet - EQYU ókili
amyrdyń 21-i. QazAqparat /Qanat Mámetqazyuly/ - Óńirlik jergilikti ózin-ózi basqarýda genderlik teńdikke de nazar aýdarý qajet.
Búgin «Jergilikti ózin-ózi basqarýdy damytý - óńirlerdiń ornyqty damýynyń qajetti sharty» atty halyqaralyq konferentsııa barysynda Astanadaǵy EQYU ortalyǵy basshysynyń orynbasary Jannet Klettser osylaı málim etti, dep habarlaıdy QazAqparat.
«EQYU-ǵa qatysýshy barlyq memleketter ózderindegi memlekettik basqarý jáne júzege asyrý baǵdarlamalaryna genderlik quram máselesin qosý týraly mindettemeler alǵan bolatyn. Sondyqtan da, uıymǵa qatysýshy elder úshin memlekettiń zań shyǵarý bıligine jáne basqarý deńgeılerinde názik jandylardyń qatysýyn arttyrý máselesi ózekti bolyp otyr. Al bul úshin eń aldymen óńirlik jergilikti ózin-ózi basqarýlardaǵy áıelderdiń aralasýyna da úlken mán bergen oryndy», dedi J. Klettser.
Sonymen birge, Qazaqstanda teń quqyqtar men birdeı múmkindikter týraly negizgi zań qabyldanǵanyna toqtalǵan EQYU ókili, bul normanyń jergilikti ózin-ózi basqarý deńgeıinde qalaı qoldanylyp jatqanyna nazar aýdarý qajettigin aıtty.
«Jergilikti ózin-ózi basqarý týraly zańnamany jetildirý jáne onyń oryndalý tetikterin damytý turǵysynda ákimdikter men máslıhattarda, jalpy óńirlerdegi basshylyq oryndarda áıel zatynyń qatysý úlesin artyrý týraly sharany da qamtyǵan oryndy dep bilemiz», dedi J. Klettser.
Sonymen birge, ol Qazaqstanda azamattyq, jergilikti ózin-ózi basqarý ınstıtýttaryn odan ári damytý joldary jetildirilip otyrǵanyna rızashylyǵyn aıta kele, bul turǵyda Qazaqstannyń EQYU-ǵa tóraǵalyǵy barysyndaǵy ustanymyn da eske saldy.
