Óńirlik kórsetkishte eń joǵary jalaqy Mańǵystaý oblysynda-QR Statıstıka agenttigi

2011 jylǵy jeltoqsandaǵy bir qyzmetkerdiń ortasha aılyq ataýly jalaqysy 119144 teńgeni qurady jáne ótken jylǵy sáıkes kezeńmen salystyrǵanda 22,5 paıyzǵa, naqty kóriniste 14,1 paıyzǵa ósti.

Salalyq qurylymda jalaqynyń eń úlken mólsheri kásibı, ǵylymı jáne tehnıkalyq qyzmette - 241,4 myń teńge (ortasha respýblıkalyq deńgeıden 2 esege asady), qarjy jáne saqtandyrý qyzmetinde - 238,8 myń teńge (2 ese), ken óndirý ónerkásibi jáne karerlerdi qazýda 234,8 myń teńge (2 ese) deńgeıinde saqtalýda. Eń tómengi jalaqy aýyl, orman jáne balyq sharýashylyǵyndaǵy qyzmetkerlerinde belgilendi (55,7 myń teńge) .Bul el boıynsha orta kórsetkishten 53,2 paıyzǵa tómen.

Óńirlik kórsetkishte eń joǵary jalaqy Mańǵystaý oblysynda 220,9 myń teńge kóleminde belgilendi. Bul ortasha respýblıkalyq kórsetkishten 1,9 esege asady. Soltústik Qazaqstan oblysynda munyń shamasy 77,5 myń teńgeni qurady, bul el boıynsha ortasha deńgeıden 35 paıyzǵa tómen.