Óńirlik isker áıelder keńesi aıasynda kásibı qaýymdastyqtar quryla bastady

ShYMKENT. QazAqparat - Shymkentte áıelder kásipkerligin damytý maqsatynda «Áıel jáne bıznes - ashyq dıalog» atty bıznes forým ótti, dep habarlaıdy QazAqparat tilshisi.

Elimizdegi isker áıelder keńesiniń tóraıymy ári «Atameken» Ulttyq kásipkerlik palatasy prezıdıýmynyń hatshysy Lázzat Ramazanovanyń qatysýymen ótken basqosýda bıznesvýmender kásipterinde kezdesken problemalyq máselelerin kóterip, tabys tabýdyń joldaryn talqylady.

Oblystyń barlyq qala-aýdandarynan kelgen 100-ge jýyq qyz-kelinshek bıznesti júrgizý úshin qandaı jaǵdaılar jasalyp otyrǵandyǵyn bilip, ózara tájirıbe almasty. Óz armandaryn júzege asyrý úshin ne qajet degen saýalǵa jaýap izdep, zańdyq turǵyda keńester aldy.

«Bizge tek jumys jasaý qajet, tájirıbe jınaqtap, qıyndyqtardan qoryqpaýymyz kerek. Bizdiń maqsatymyz - myńdaǵan áıelder óz armandaryn júzege asyrýǵa kómektesý jáne bizdiń elimizdegi genderlik saıasattyń shynymen jumys isteıtinin kórsetý bolyp tabylady», - dedi QR «Atameken» UKP isker áıelder keńesi tóraıymy Lazzat Ramazanova.

Jıynǵa qatysqandardyń pikirinshe, qazirgi tańda qarjylandyrýdyń azdyǵy, nesıeniń qoljetimsizdigi jáne bıznes quzyrettiliginiń jetkiliksizdigi kásip ashýǵa qolbaılaý bolyp otyr. Osy syndy ózekti problemalardy sheshý úshin óńirlerdegi isker áıelder keńesteriniń aıasynda kásibı qaýymdastyqtar men keńester quryla bastaǵan.

«Bizdiń basty maqsatymyz - kásibı standarttardy naqty belgileý. Osy kásibı standarttardy engizý arqyly biz ózimizdiń ashyq básekege shyǵýymyzdy jáne óz taýarlarymyzdy, óz qyzmetterimizdi joǵary deńgeılerde kórsetýge múmkindik beredi dep oılaımyz», - deıdi Lázzat Ramazanova.