Óńirlik habtyń qurylýy aımaqtaǵy memlekettik qyzmettiń damýyna tyń serpin beredi - Á. Báımenov
ASTANA. 15 naýryz. QazAqparat - Memlekettik qyzmet salasynda Óńirlik habtyń qurylýy ózekti másele jáne onyń qajettiligi aıqyn.
Búgin Astanada Memlekettik qyzmet salasyndaǵy Óńirlik habtyń quryltaı konferentsııasynda sóz sóılegen Qazaqstan Respýblıkasynyń Memlekettik qyzmet isteri agenttiginiń tóraǵasy Álıhan Báımenov osylaı málim etti.
Agenttik tóraǵasynyń aıtýynsha, qazaqstandyq memlekettik qyzmet modelin halyqaralyq sarapshylar joǵary baǵalap otyr. Degenmen, qoǵamnyń joǵary talaptary men synaqtardy eskere otyryp, Memleket basshysy reformalardyń kelesi kezeńine basymdyqtardy anyqtaǵan. Sondyqtan da, agenttik tóraǵasy búgingi alqaly jıynnyń ózindik sımvoldyq máni bar ekenine toqtaldy. «Qazaqstan óziniń memlekettik qyzmet salasyndaǵy jınaqtaǵan tájirıbesimen bólisýge daıyn. Aımaqtyq hab qurý boıynsha ustanymdar búgin taratylǵan tujyrymdamanyń jetildirilgen nusqasynda da kórinis tapty. Tujyrymdama jobasy boıynsha kóptegen usynystar da kelip tústi. Onda aıtylǵan pikir ortaq - memlekettik qyzmet salasynda Óńirlik habtyń qurylýy ózekti másele jáne onyń qajettigi aıqyn», - dedi Á. Báımenov. Onyń sózine qaraǵanda, memlekettik qyzmet salasynda aıtýly ortalyq qurylsa, bul yntymaqtastyqqa jańa serpin berip, aımaqtaǵy memlekettik qyzmettiń damýyna eleýli úles qosatyn bolady.
