Óńirlik hab jas ǵalymdar arasynda memlekettik qyzmet salasyndaǵy úzdik strategııaǵa baıqaý jarııalaıdy

Bul týraly búgin «Intellektýaldy kóshbasshy:Qazaqstan damýynyń jańa kezeńi» atty taqyrypta ótken halyqaralyq konferentsııada Memlekettik qyzmet salasyndaǵy Óńirlik hab Basqarýshy komıtetiniń tóraǵasy Álıhan Baımenov málim etti.

Sóz arasynda Álıhan Baımenov QR Prezıdenti janyndaǵy Memlekettik basqarý akademııasymen birlesken is-qımyl jospary ázirlenip jatqanyn atap ótti.

«Onda tyń zertteýlerge qoldaý bildirip, olardy yntalandyrý máselesi de qamtylyp otyr. Eń bastysy jas ǵalym-mamandardy qoldaýǵa, olardyń zertteýlerin yntalandyrýǵa baǵyttalǵan birqatar sharalardy josparlaımyz. Sonyń ishinde biz memlekettik qyzmet salasyndaǵy problemalarǵa arnalǵan úzdik strategııalarǵa baıqaý jarııalaǵymyz keledi. Soǵan baılanysty halyqaralyq jýrnaldar talaptaryna sáıkes dep tanylǵan maqalalardy Óńirlik hab jýrnalynda jarııalaıtyn bolamyz. Olardy Habtyń jýrnalyna ǵana emes, halyqaralyq jýrnaldarǵa da shyǵarýǵa tyrysamyz. Sondyqtan da, barlyqtaryńyzdy osyǵan belsendi qatysýǵa shaqyramyn», - dedi Á. Baımenov.

Konferentsııa barysynda akademııa doktoranttary memlekettik basqarý salasyndaǵy ǵylymı zertteýlerdiń zamanaýı ádisteri týraly baıandamalar jasady. Sonymen qatar, Qazaqstanda aqparattyq qoǵam qurýdaǵy aqparattyq tehnologııalardyń atqaratyn róli týraly áńgime qozǵaldy.