Óńirlik elektr jelileri kompanııalarynyń shyǵyndaryn esepteý barysynda salystyrmaly taldaý engizilýi tıis - N. Aldabergenov
ASTANA. Qazannyń 30-y. QazAqparat /Qanat Mámetqazyuly/ - Óńirlik elektr jelileri kompanııalarynyń tıimdiligin baǵalaý úshin olardyń tarıfterin bekitý barysynda salystyrmaly taldaý ádisin engizý qajet.
Búgin QR Parlamenti Májilisi janyndaǵy Qoǵamdyq palatanyń otyrysynda «Tabıǵı monopolııalar jáne retteletin naryqtar týraly» zań jobasy boıynsha baıandama jasaǵan Tabıǵı monopolııalardy retteý agenttiginiń tóraǵasy Nurlan Aldabergenov osylaı málim etti, dep habarlaıdy QazAqparat.
«Bundaı salystyrmaly taldaý ádisteri álemdik tájirıbede bar. Máselen, Avstralııa, Belgııa, Danııa men AQSh-ta osyndaı ádister keńinen qoldanylady. Al salystyrmaly túrde alatyn bolsaq, Qazaqstanda bul saladaǵy kompanııalardyń sany da ájeptáýir jáne olardyń daıyn turǵan málimetter bazasy da barshylyq. Sondyqtan da, osy málimetter bazasyna qarap-aq olardyń paıdalaný qyzmetterine qatysty shyǵyndaryna salystyrmaly saraptama júrgizýge bolady», dedi Agenttik tóraǵasy.
Sonymen birge, zań jobasynda naryqtaǵy sýbektilerdi memlekettik retteýdiń tıimdi sharalary qamtylǵanyna toqtalǵan N. Aldabergenov, bul baǵytta naryqta monopolııa jaǵdaıyn ıemdengen domınanttar úshin ýákiletti organdarǵa qosymsha quqyqtar berilýi tıistigin atap ótti. «Bundaı quqyqty júzege asyrý domınanttarǵa qatysty ıkemdi baǵalyq retteýdi qamtamasyz etetini aıqyn. Osy rette ýákiletti organ bekitken shek aıasynda domınanttar baǵany ózgertý múmkindigin de ıelenedi», dedi N. Aldabergenov.
