Óńirlik BAQ forýmy: Óńirlik gazetter jekemenshikke óte me

ASTANA. QazAqparat - Elordada ótip jatqan Óńirlik BAQ forýmynda elimizdiń Aqparat jáne kommýnıkatsııalar mınıstri Dáýren Abaev jergilikti gazetterge qatysty mınıstrlik ustanymyn aıtty, dep habarlaıdy QazAqparat.

«Bul másele boıynsha dúısenbi kúni keshki saǵat 6-ǵa taman oblys ákimderiniń orynbasarlarymen birge jınalys ótkizemiz. Onda osy suraqty talqylaımyz. Qazirgi tańda eki nemese úsh joly bar. Bir joly gazetterdiń barlyǵy jekemenshik bolady», - dedi mınıstr forým barysynda «Jetisý» gazeti tilshisiniń óńirlik gazetterdiń aldaǵy ýaqyttaǵy taǵdyryna qatysty suraǵyna oraı.

Onyń paıymynsha, jergilikti gazetter zamanǵa, zańdylyqqa saı bolýy úshin jekemenshik bolýlary qajet.

«Ekinshi joly «Kazpravda» men «Egemenge» qazaq jáne orys tildi gazetterdi qossaq. Sol kezde ǵana bul gazetter jekemenshik bolmaıdy. Bul baǵyttardyń barlyǵyn biz qarastyryp jatyrmyz. Oblystyq ákimdikterdiń kózqarasyn bilemiz. Sondyqtan bul máseleni biz Úkimet deńgeıinde sheshsek. Jalpy, ózim bul gazetterdiń bárin bir ujymǵa ákelý maqsatym joq, mınıstrlikte de ondaı maqsat joq. Ony sizder túsinýlerińiz kerek. Jınalysta men oblys ákimderiniń orynbasarlaryna usynyp kóremin. Olar qoldasa ony Úkimet basshysyna usynar edim. 1-2 kúnniń ishinde sheshiletin másele ǵoı, kúte turyńyzdar. Bári durys bolady dep oılaımyn», - dedi Abaev.

Aıta keteıik, sharaǵa Parlament depýtattary, Prezıdent ákimshiliginiń ókilderi, respýblıkalyq jáne óńirlik BAQ basshylary, jýrnalısteri, ortalyq jáne jergilikti atqarýshy organdardyń ókilderi, Reseıdiń tanymal telejýrnalısteri qatysýda. Úsh sessııamen ótetin forým barysynda qazaqstandyq jýrnalıster men qoǵamdy alańdatatyn ózekti máseleler talqylanýda.