Óńirlik aqparat quraldarymen jumys isteý memleketke ǵana emes, medıa birlestikterdiń ózine de mańyzdy - Mádenıet jáne aqparat vıtse-mınıstri
ALMATY. Qarashanyń 25-i. QazAqparat /Erlik Erjanuly/ - Óńirlik aqparat quraldarymen jumys isteý memleketke ǵana emes, medıa birlestikterdiń ózine de mańyzdy. Bul birjaqty qalyptasyp kele jatqan jaqsy dástúr, jaqsy nyshan. Búgin Almatyda ótip jatqan ІІ medıa quryltaıda QR Mádenıet jáne aqparat vıtse-mınıstri Ǵazız Telebaev osylaı aıtty,
dep habarlaıdy QazAqparat.
«Meni bul sharany uıymdastyrýshylardyń óńirlik aqparat quraldaryn shaqyrǵany qýantyp otyr. Óıtkeni óńirlik aqparat quraldarymen jumys isteý óte mańyzdy. Ol memleketke ǵana emes, medıa birlestikterdiń ózine de mańyzdy. Sebebi, búkil el aýmaǵyn qamtymaıtyn aqparat quraldary óz pikirlerin, óz oılaryn Qazaqstan halqyna jetkize almaıdy», dedi Ǵ. Telebaev.
Mádenıet jáne aqparat vıtse-mınıstriniń sózine qaraǵanda, jaqynda Astanada ótken buqaralyq aqparat quraldary ókilderiniń keńesinde jýrnalısterdiń kásibı merekesi qarsańynda búkil aqparat quraldarynyń óńirlik jáne ortalyq kezdesýin ótkizip turý týraly ıdeıa aıtylǵan. «Bul quptarlyq bastama. Óıtkeni aýdandyq jáne ortalyq gazet jýrnalısteriniń qashan bas qosqanyn qazir eshkim aıta da almaıdy», dedi ol.
