Óńirlerge úzdik pedagogtardy tartý – josparlanǵan 2 myń muǵalimniń 56-sy ǵana ótken

ASTANA. QazAqparat – Óńirlerge úzdik pedagogtardy tartý baǵdarlamasynyń talaptary qaıta qaralady. Bul týraly QR Oqý-aǵartý mınıstri Ǵanı Beısembaev aıtty, dep habarlaıdy QazAqparat tilshisi.

Mınıstrdiń aıtýynsha, bilim sapasyn baǵalaýda basty nazar ishki jáne syrtqy baǵalaý quraldaryna baǵyttalady.

Mektepke deıingiden TjKB-ǵa deıingi barlyq deńgeıde bilim berý sapasyn baǵalaýdyń ulttyq sheńberin ázirleý josparlanǵan.

«Óńirlerge úzdik pedagogtardy tartý baǵdarlamasyn iske asyrýǵa nazar aýdarǵym keledi. Baǵdarlamany baǵalaý krıterııleri boıynsha josparlanǵan 1954 pedagogtyń 56-sy ótti (Atyraý oblysy – 9, Mańǵystaý oblysy – 9, Túrkistan oblysy - 13, Almaty oblysy – 25). Sondyqtan baǵdarlamaǵa qatysatyn muǵalimderge qoıylatyn talaptardy qaıta qaraý jóninde sheshim qabyldadym. Bul másele pedagogtar men sarapshylar qaýymdastyǵyn tarta otyryp talqylanady», - dedi Ǵanı Beısembaev elordada ótken mınıstrliktiń alqa otyrysynda.

Buǵan deıin Oqý-aǵartý mınıstri «Altyn belgige» úmitker oqýshylardyń bilimin NZM-da rastaý týraly suraqqa jaýap bergen edi.