Óńirlerdiń bıýdjetin kóterý úshin qosymsha salyq túsimderi ákimdikterge beriledi
«Bıýdjettiń shıkizattyq sektordan táýeldiligine jáne salyq salasyndaǵy ákimshilendirýge qatysty syn-pikirler aıtyldy. Sońǵy 5 jyldaǵy salyq túsimderiniń jalpy kólemindegi shıkizattyq emes sektordyń úlesi ortasha alǵanda 68 % qurady. Osy jyldar ishinde shıkizattyq sektordyń úlesi 32%-ten asqan joq. Degenmen, jahandyq ekonomıkanyń birtindep jandanýy negizgi eksporttyq pozıtsııalarǵa baǵanyń ósýine alyp keldi. Bul shıkizattyq sektordan túsetin túsimderdi ulǵaıtýǵa múmkindik berdi. Máselen, jer qoınaýyn paıdalanýshylarǵa salyq boıynsha tekserýler men gorızontaldy monıtorıng nátıjesinde bıýdjetke qosymsha 200 mlrd teńgeden astam qarajat óndirip alyndy», - dedi E. Jamaýbaev.
Onyń aıtýynsha, Úkimet salyq bazasyn keńeıtý, ıaǵnı bıznesti damytý jáne olardy kóleńkeden shyǵarý, salyq ári jáne kedendik ákimshilendirýdi jetildirý, memlekettik kásiporyndardy jekeshelendirý jáne basqa da kózder arqyly bıýdjet kiristerin ártaraptandyrýǵa arnalǵan is-sharalardy júıeli túrde júrgizetin bolady. Máselen, sońǵy 3 jyldyń ózinde salyqtyq jáne kedendik ákimshilendirý men tsıfrlandyrýdan bıýdjetke 2 trln teńgeden astam qosymsha túsimder qamtamasyz etilgen. Onyń tek 680 mlrd teńgeden astamy byltyr túsken.
«Byltyr Qytaı Halyq Respýblıkasynyń eksporty – Qazaqstan Respýblıkasynyń ımporty baǵyty boıynsha statıstıkalyq derekterdegi alshaqtyq 40,5 paıyzǵa tómendedi. Bul baǵyttaǵy jumys kúsheıtiletin bolady», - dedi mınıstr.
Sonymen qatar Úkimet basshysynyń orynbasary bıýdjet shyǵystaryna qatysty toqtaldy.
«Biz Esep komıtetiniń respýblıkalyq jáne jergilikti bıýdjetter arasyndaǵy qarjy aǵyndaryn barynsha azaıtý jónindegi usynysymen kelisemiz. Óńirlerdiń bıýdjet derbestigin nyǵaıtý úshin qosymsha salyq túsimderin ákimdikterge berý jolymen bıýdjetaralyq qatynastardy reformalaý júzege asyrylatyn bolady», - dedi E. Jamaýbaev.
Budan buryn habarlanǵandaı, Erulan Jamaýbaev depýtattardyń bıýdjetke qatysty usynymdary Úkimet jumysynda eskeriletinin aıtty.
