Óńirlerdiń aýmaqtyq josparlanýyn jetildirý úshin Qazaqstan aýmaǵyn uıymdastyrýdyń bas shemasy ázirlenedi - S. Nokın
ASTANA. Qyrkúıektiń 8-i. QazAqparat /Ernur Aqanbaı/ - Óńirlerdiń aýmaqtyq josparlanýyn jetildirý jáne eldi mekenderdiń qala qurylysyn damytý maqsatynda Qazaqstan aýmaǵyn uıymdastyrýdyń bas shemasyn jáne respýblıkalyq deńgeıde memlekettik qala qurylysy kadastryn ázirleý josparlanyp otyr.
Bul týraly búgin Úkimet otyrysynda Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın aıtty.
Onyń aıtýynsha, bas shema el aýmaǵynyń perspektıvalyq strategııalyq máselelerin qarastyrady jáne uıymdastyrady, adamnyń mekendeıtin ári tirshilik etetin qolaıly ortasyn jasaý maqsatynda eldi mekender men qonysaralyq aýmaqtardy turaqty damytýdy qamtamasyz etýge baǵyttalǵan sharalardy aıqyndaıdy. Memlekettik qala qurylysy kadastrynyń negizgi maqsaty - tıisti qala qurylysy aýmaǵynda sáýlet, qala qurylysy jáne qurylys qujattamasyn basqarýdyń avtomattandyrylǵan aqparattyq júıesin jasaqtaý. «Bizdiń oıymyzsha, sáýlet, qala qurylysy jáne qurylys qujattamasyn basqarýdyń biryńǵaı memlekettik avtomattandyrylǵan aqparattyq júıesin qurmaı qazirgi zamanda salany damytý múmkin emes», dedi S. Nokın.
