Óńirlerdi aýyz sýmen jabdyqtaýǵa sýbsıdııa bólýdiń talaptary jeńildetildi
NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń Sý kodeksine jergilikti ókildi, ortalyq jáne jergilikti atqarýshy organdar arasynda aýyzsýmen jabdyqtaýdy sýbsıdııalaý jónindegi ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.
Zań jobasy Parlament depýtattarynyń bastamashylyǵymen ázirlendi. Onyń negizgi maqsaty - halyqty aýyzsýmen qamtamasyz etý úshin sýbsıdııalardy bólý jáne óńirlerdiń ýaqytyly alýyna qol jetkizý.
«Búgingi kúni halyqty aýyzsýmen jabdyqtaý qyzmetteriniń qunyn tómendetý maqsatynda zańnamamen balamasyz kózderden aýyzsýdy sýbsıdııalaý kózdelgen. Memleket aýyzsýdyń qunyn sýbsıdııalaý bóliginde halyqqa kepildendirilgen qoldaý kórsetýde.
Ýákiletti organnyń málimetine sáıkes, 2020 jyldyń qorytyndysy boıynsha aýyl halqynyń 87%-y ortalyqtandyrylǵan aýyzsýmen qamtyldy. Ortalyqtandyrylǵan aýyzsýmen qamtylǵan aýyldyq eldi mekenderdiń sany – 4078, solardyń ishinde 42%-y sýbsıdııaǵa qol jetkizgen. Qoldanystaǵy zańnamaǵa jasalǵan taldaý sýmen jabdyqtaý obektilerin ýákiletti organ bekitetin tizbege engizý protsesi kóptegen vedomstvoaralyq kelisýlerdi talap etetinin kórsetip otyr. Ókinishke qaraı, atalǵan kelisýler 1-2 jylǵa deıin sozylyp ketýi osynyń dáleli», - dedi senator Narıman Tóreǵalıev.
Osyǵan baılanysty, zań jobasymen aýyzsýdy sýbsıdııalaý úshin tizbeni bekitý kezinde ókilettikterdiń arajigin naqty ajyratý usynylyp otyr.
Birinshiden, aýyzsýmen jabdyqtaýdyń jergilikti júıeleri jergilikti atqarýshy organdar deńgeıine beriletin bolady, al toptyq júıeler burynǵydaı ýákiletti organnyń qaraýynda qalady.
Ekinshiden, jergilikti ókildi organdardyń ózine óńirdiń sýmen jabdyqtaý boıynsha kórsetiletin qyzmetterdiń tarıfterine baılanysty aýyz sýdyń 1 tekshe metri úshin tólem mólsherin bekitýge ókilettilik beriledi.
«Mysaly, máslıhat respýblıka boıynsha eń tómengi tarıften tómen emes jáne oblystyń áleýmettik-ekonomıkalyq damýyn eskere otyryp, ortasha oblystyq deńgeıden joǵary emes tólemder mólsherin bekite alady. Jalpy alǵanda, osy zań jobasynyń normalary jergilikti atqarýshy organdardyń derbestigi men jaýapkershiligin arttyrýǵa, halyqty aýyzsýmen qamtamasyz etý úshin óńirlerdiń sýbsıdııany ýaqytyly alýyna yqpal etetin bolady», - dedi depýtat.
Senat tóraǵasy Máýlen Áshimbaev aýyldyq eldi mekenderdi sapaly aýyzsýmen qamtamasyz etý elimizdiń aldynda turǵan basty mindetterdiń biri ekenin atap ótti.
«Depýtattar bastamashylyq jasaǵan osy zań aýyldyq jerlerdi sýmen jabdyqtaý máselelerin sheshý jolyndaǵy mańyzdy qadam ekeni sózsiz. Usynylyp otyrǵan normalar óńirlerdi damytýǵa jáne jergilikti atqarýshy organdardyń jumysynyń tıimdiligin arttyrýǵa yqpal etetini aıqyn», - dep atap ótti M. Áshimbaev.
