Óńirlerdegi «Jol kartasy» boıynsha atqarylǵan jumystar men salynǵan nysandardyń sapasy syn kótermeıdi - N. Sabılıanov
ASTANA. Qyrkúıektiń 15-i. QazAqparat /Qanat Mámetqazyuly/ - óńirlerdegi «Jol kartasy» boıynsha atqarylǵan jumystar men salynǵan nysandardyń sapasy syn kótermeıdi. Búgin QR Parlamenti Májilisiniń jalpy otyrysynda Eńbek jáne halyqty áleýmettik qorǵaý mınıstrine, Bas prokýrorǵa, Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń atyna joldaǵan saýalynda depýtat Nurtaı Sabılıanov osylaı málim etti.
«Halyqty jumyspen qamtý strategııasyn júzege asyrý boıynsha eki jyl qatarynan «Jol kartasy» baǵdarlamasy júzege asyrylýda. Baǵdarlama boıynsha áleýmettik nysandar salý, kúrdeli jóndeýler júrgizýmen qatar jas mamandardy daıarlap, olardyń eńbekke aralasýyna qoldaý sharalary júrgizilip keledi. Jańa jumys oryndary da ashylyp jatyr. Alaıda, óńirlerde osy «Jol kartasy» aıasynda atqarylyp jatqan jumystarmen tanysý barysynda kóptegen kemshilikter anyqtaldy. Atap aıtqanda, «Jol kartasy» boıynsha atqarylǵan jumystar men salynǵan nysandardyń sapasy syn kótermeıdi», dedi depýtat.
Onyń aıtýynsha, nysandy salyp jatqan merdigerlerdiń jumysshylarmen eńbek shartyn jasaý máselesinde de keleńsizdikter kezdesip otyr. Sonymen birge, qytaıdyń arzan materıaldaryn qurylysqa paıdalaný saldarynan qoldanýǵa berilgen nysandardyń sapasy tómendep ketken. «Degenmen, álgindeı arzan materıaldardy paıdalana otyryp, nysandardyń salyný qunyn sharyqtatyp jibergen jáıttar da oryn alyp otyr. Máselen, Aıagóz aýdanyndaǵy bir aýylda 1 shaqyrym sý qubyryn qaıta jóndeý úshin 33 mln. teńge bólinipti», dedi depýtat.
