Óńirlerdegi jedel járdem qyzmetine kóńilińiz tola ma
ASTANA. QazAqparat - Parlament Májilisindegi jalpy otyrysta depýtat Nurtaı Sabılıanov jedel járdem qyzmetiniń jaǵdaıy boıynsha másele kóterdi, dep habarlaıdy QazAqparat.
«Depýtattyq saýal óńirlerde jedel medıtsınalyq kómek avtokólikterin jańartý máselesine baılanysty bolyp otyr. Bul taqyryp saılaýshylar tarapynan jıi kóterilýde. Jalpy, jedel járdem avtokólikteri oblystyq bıýdjetterdiń, Astana jáne Almaty qalalary bıýjetteriniń qarajatyna satyp alynady. Alaıda jergilikti bıýdjetterde qarajattyń jetkiliksiz bolýyna baılanysty jańa kólikterdi alý baıaý qarqynmen júrgizilýde. Qazirgi ýaqytta óńirlerde 2 124 jedel járdem avtokólikteri paıdalanylýda. Olardyń ishinde 771-i nemese 36 paıyzy eski kólikter. Sonyń ishinde 2000 jylǵa deıin shyǵarylǵan 26 avtokólik bar eken. Al 2000-2010 jyldar aralyǵynda shyǵarylǵan 745 mashına bar»,-dep toqtaldy Sabılıanov QR Premer-Mınıstri Baqytjan Saǵyntaevqa joldaǵan depýtattyq saýalynda.
Onyń sózine qaraǵanda, keıbir óńirlerde uzaq qoldanystaǵy jedel medıtsınalyq avtokólikterdiń sany 50 paıyzdan asady. Mysaly, Qostanaı, Aqmola, Jambyl oblystarynda 50 paıyzdan assa, Mańǵystaý oblysynda 46 paıyz jáne Aqtóbe oblysynda 37 paıyz deńgeıinde eski kólikter paıdalanylýda.
«Bul másele densaýlyǵyna qaýip tóngen kezde shuǵyl medıtsınalyq kómek alýdy, tez jáne bógetsiz tasymaldaýdy qajet etetin alystaǵy eldi mekenderdiń turǵyndaryna qıyndyq týǵyzady. Sonymen qatar tegin medıtsınalyq kómektiń kepildi kólemine kiretin jedel medıtsınalyq kómekti azamattarǵa sapaly kórsetý jaqsy jabdyqtalǵan jedel járdem avtokólikterine de baılanysty. Jalpy bul máseleni sheshý úshin 5 mlrd. teńgege tarta qarajat qajet. Aıta keteıin, 2016 jyly respýblıkalyq bıýdjetten kólik quraldaryn satyp alý úshin 81 mlrd. teńge jumsalǵan eken. Osyǵan oraı Sizden tıisti medıtsınalyq quraldarmen jabdyqtalǵan jańa sapaly medıtsınalyq kólikterdi satyp alý úshin oblystyq, Astana men Almaty qalalarynyń bıýdjetterine nysanaly transfert retinde qosymsha qarajatty bólý máselesin qarastyrýdy suraımyn»,-dedi Nurtaı Sabılıanov.
