Óńirlerdegi jańa modýldik statsıonarlarǵa qansha maman jumysqa tartylady
NUR-SULTAN. QazAqparat – Qazaqstan óńirlerinde 5 myńǵa jýyq medıtsına qyzmetkeri jańa modýldik statsıonarlarǵa jumysqa tartylady. Bul týraly Respýblıkalyq densaýlyq saqtaýdy damytý ortalyǵynyń bas dırektory Qanat Tósekbaev málim etti, dep habarlaıdy QazAqparat tilshisi.
«Koronavırýs indetiniń yqtımal jańa tolqynyna tosqaýyl qoıý turǵysynda qazirgi kezde Densaýlyq saqtaý mınıstrligi tarapynan aýqymdy jumystar atqarylýda. Osy oraıda medıtsınalyq ınfraqurylym daıyndalyp jatyr. Conymen qatar, dári-dármekpen jáne kadrlarmen qamtamasyz etý baǵytyna ekpin qoıylyp otyr», - dedi Q. Tósekbaev koronavırýsqa qarsy sharalarǵa jumyldyrylǵan densaýlyq saqtaý qyzmetkerlerin áleýmettik-ekonomıkalyq turǵydan qoldaý taqyrybyna arnalǵan onlaın talqylaýda.
Onyń sózine qaraǵanda, 13 óńirde 4328 oryndy qamtyǵan modýldik statsıonarlar jumysyn bastaıdy. Bul oryndar koronavırýs ınfektsııasyn juqtyrǵan naýqastarǵa daıyndalǵan. Osy klınıkalardaǵy jumysqa 4783 medıtsına qyzmetkeri jumyldyrylady.
«Modýldi statsıonarlarǵa tartylatyn dárigerler sany 976-ke jetedi, al orta medıtsınalyq personal 2 myńnan astam, kishi personalda 1782 qyzmetker bolady», - dedi ortalyq basshysy.
Onyń aıtýynsha, bıyl mamandardy daıarlaý men qaıta daıarlaýda ınfektsııalyq aýrýlarǵa jáne bronh-ókpe aýrýlaryn emdeýge aıryqsha nazar aýdaryldy.
