Óńirlerdegi turǵyndar Nazarbaevtyń aty berilgen kóshelerdiń ataýyn ózgertýdi kóterip jatyr – depýtat

ASTANA. QazAqparat – Óńirlerde Nursultan Nazarbaevtyń aty berilgen úlken dańǵyldardyń ataýyn ózgertý máselesin jergilikti deńgeıde sheshý kerek. Bul týraly Májilis depýtaty Erlan Saırov aıtty, dep habarlaıdy QazAqparat tilshisi.

«Biz óńirlerge barǵanda, turǵyndar bul baǵytta másele kóterip jatady. Sebebi, ár oblysta Nursultan Nazarbaevtyń aty berilgen úlken dańǵyldar bar. Meniń oıymsha, bul máseleni jergilikti deńgeıde sheshý kerek. Kósheniń atyn aýystyrý úshin máslıhat sheshim qabyldaýy tıis. Jalpy, turǵyndar bul máselege qatysty ózderiniń usynystaryn aıtyp jatyr», - dedi E.Saırov Parlament palatalarynyń birlesken otyrysynan keıin tilshiler suraǵyna jaýap bere otyryp.

Osy oraıda ol Parlamenttiń Elbasy týraly qujattyń kúshin joıýǵa baǵyttalǵan Konstıtýtsııalyq zańdy qabyldaýy qoǵam talaby boıynsha iske asyrylǵanyn aıtty.

QR Parlamenti palatalarynyń birlesken otyrysynda «QR Tuńǵysh Prezıdenti – Elbasy týraly» Konstıtýtsııalyq zańnyń kúshi joıyldy dep taný týraly» Konstıtýtsııalyq zań qabyldandy.

Atalǵan zań jobasy jalpyulttyq referendým nátıjesinde Qazaqstan Konstıtýtsııasyna engizilgen ózgeristerdi iske asyrý maqsatynda ázirlendi.

E. Saırovtyń sózine qaraǵanda, eks-prezıdent Nursultan Nazarbaevta burynǵy basymdyqtary bolmaıdy.