Óńirlerdegi turaqtandyrý qorlarynda 35 myń tonna azyq-túlik bar – Saýda mınıstrligi

NUR-SULTAN. QazAqparat – Óńirlerdegi áleýmettik-kásipkerlik korporatsııalar turaqtandyrý qorlaryna 35 myń tonna azyq-túlik taýaryn jınap qoıǵan. Bul týraly Saýda jáne ıntegratsııa vıtse-mınıstri Azamat Asqaruly málim etti, dep habarlaıdy QazAqparat tilshisi.

«Eginniń jańa túsimi, jemis-jıdek pen kókónistiń pisýine baılanysty sút pen et ónimderine suranystyń azaıýy, azyq-túlik taýarlaryn syrtqa shyǵarýǵa tyıym salý – baǵa ósiminiń qarqynyn tómendetýge jol ashty. Bekitilgen qunmen qatar, azyq-túlik baǵasyn ustap turýdyń taǵy bir amaly – «aınalymdy shema» men «turaqtandyrý qorlaryn qurý», oılastyrylǵan logıstıka men tasymal jelisin tsıfrlandyrý bolyp otyr. Saýda jelilerine «Aınalymdy shema» boıynsha jeńildetilgen qaryz berildi. Osy qaryz boıynsha olarǵa áleýmettik mańyzy bar azyq-túlik taýarlarynyń baǵasyn ustap turý mindettemesi júkteldi. Jalpy saýda jelilerine jergilikti bıýdjetten 17,42 mlrd teńge bólindi», - dedi Azamat Asqaruly OKQ-da ótken baspasóz máslıhatynda.

Onyń aıtýynsha, áleýmettik-kásipkerlik korporatsııalar turaqtandyrý qorlaryna 35 myń tonna azyq-túlik taýaryn jınap qoıǵan. Odan bólek turaqtandyrý qorlaryna 7 myń tonna azyq-túlik taýaryn jetkizý boıynsha kelisim jasalǵan.

Eske sala ketsek, buǵan deıin Azamat Asqaruly jyl basynan 21 shildege deıin azyq-túlik taýarlarynyń baǵasy 5,7 paıyzǵa óskenin málim etken edi. Áıtse de bul sońǵy bes jyldaǵy rekordtyq ósim dep aıtýǵa kelmeıdi. Azamat Asqaruly 2016 jyly bul kórsetkish birden 9,1 paıyzdyq, al 2019 jyly 7,7 paıyzdyq ósimdi kórsetkenin aıtady.