Óńirlerdegi tótenshe jaǵdaı: Bas Prokýratýra qazaqstandyqtarǵa eskertý jasady
***
Qazaqstan Respýblıkasy Bas Prokýrorynyń orynbasary B. B. Dembaevtyń «Prokýratýra týraly» Zańnyń 31-baby tártibinde úndeýi
QURMETTІ AZAMATTAR!
Qoǵamdyq qaýipsizdikti qamtamasyz etý, zańdylyq pen quqyqtyq tártipti qalpyna keltirý, azamattardyń quqyqtary men bostandyqtaryn qorǵaý maqsatynda Qazaqstan Respýblıkasy Prezıdentiniń Jarlyqtarymen Almaty qalasy men Mańǵystaý oblysynyń aýmaǵynda 2022 jylǵy 5 qańtar saǵat 01:30-dan 2022 jylǵy 19 qańtar saǵat 00:00-ge deıin tótenshe jaǵdaı engizildi.
Qazaqstan Respýblıkasy Prezıdentiniń Jarlyqtaryna sáıkes tótenshe jaǵdaı qoldanylatyn kezeńde ol engizilgen jerde mynadaı negizgi sharalar men ýaqytsha shekteýler kózdelgen:
- erkin júrip-turýǵa, onyń ishinde kólik quraldarynyń kirýi men shyǵýyna shekteýler belgilendi;
- tulǵalardyń jeke basyn kýálandyratyn qujattardy tekserý, jeke tekserý, olardyń janyndaǵy zattaryn, kólik quraldaryn tekserý;
- beıbit jıyndarǵa, ereýilderge jáne basqa da jappaı is-sharalarǵa tyıym salyndy.
Qosymsha ýaqytsha shekteý sharalary retinde saǵat 23:00-den 07:00-ge deıin komendanttyq saǵat engizilgen, qarýdy, oq-dárilerdi, jarylǵysh zattardy, etıl spırtin jáne alkogol ónimderin satýǵa tyıym salynǵan, jeke tulǵalardan qarý men oq-dárilerdi ýaqytsha alyp qoıý kózdelgen.
Qazaqstan Respýblıkasy «Tótenshe jaǵdaı týraly» Zańynyń 20-babyna sáıkes komendanttyq saǵat qaǵıdalaryn buzǵan jeke tulǵalardy polıtsııa qyzmetkerleri nemese áskerı patrýlder komendanttyq saǵat aıaqtalǵanǵa deıin, al ózimen birge olardyń jeke basyn kýálandyratyn qujattary joq adamdardy – olardyń jeke basyn anyqtaǵanǵa deıin, biraq ishki ister organy bastyǵynyń nemese onyń orynbasarynyń sheshimi boıynsha 48 saǵattan asyrmaı ustaýǵa tıis.
Ustalǵan adamdar jáne olardyń alyp júrgen zattary men kólik quraldary tekserilýi múmkin.
Tótenshe jaǵdaı rejıminiń kórsetilgen talaptaryn buzǵany úshin kináli tulǵalar qylmystyq jáne ákimshilik jaýaptylyqqa tartylatynyn atap ótemiz.
Osylaısha, bılik ókiliniń zańdy talabyna nemese ókimine baǵynbaý, sondaı-aq tótenshe jaǵdaı kezeńinde tyıym salynǵan ereýilge basshylyq etý jáne uıymdardyń jumysyna kedergi keltirý Qylmystyq kodekstiń (budan ári – QK) 379 jáne 401-baptary boıynsha 2 jylǵa deıin bas bostandyǵynan aıyrýǵa ákep soǵady.
Tótenshe jaǵdaı kezinde kórineý jalǵan aqparat taratý QK-niń 274-babyna saı 3 jyldan 7 jylǵa deıin bas bostandyǵynan aıyrýmen jazalanady.
Tótenshe jaǵdaı kezinde qarý-jaraqty, oq-dárilerdi, qozǵalys quraldaryn, áskerı tehnıkany nemese ózge de áskerı múlikti qasaqana joıý nemese búldirý 10 jyldan 12 jylǵa deıingi merzimge bas bostandyǵynan aıyrýdy kózdeıdi (QK-niń 459-baby).
Tótenshe jaǵdaı rejımin buzǵany úshin (Ákimshilik quqyq buzýshylyq týraly kodekstiń (budan ári – ÁQBtK) 476-baby), tótenshe jaǵdaı kezinde quqyq tártibin buzýǵa ıtermeleıtin áreketteri úshin (ÁQBtK-niń 478-baby) tıisinshe 15 jáne 30 táýlikke deıin ákimshilik qamaqqa alý kózdelgen.
Bul rette tótenshe jaǵdaı kezinde qylmystyq nemese ákimshilik quqyq buzýshylyqtar jasaý aýyrlatatyn mán-jaı bolyp tabylady (QK-niń 54-baby, ÁQBtK-niń 57-baby) jáne neǵurlym qatań jaýaptylyqqa ákep soǵady.
Zańdylyqty qamtamasyz etý maqsatynda, «Prokýratýra týraly» Zańnyń 31-babyn basshylyqqa ala otyryp, azamattardy ótkiziletin is-sharalarǵa túsinistikpen qaraýǵa, ishki ister organdary men ýákiletti organdar qyzmetkerleriniń zańdy talaptaryn saqtaýǵa, olarǵa qajetti járdem kórsetýge shaqyramyz.
Sondaı-aq, shyndyqqa sáıkes kelmeıtin málimetterdi taratpaýǵa, arandatýshylyqqa berilmeýge jáne tótenshe jaǵdaı rejımin buzbaýǵa, resmı derekkózderde ornalastyrylǵan eldegi aǵymdaǵy jaǵdaı týraly senimdi aqparatty basshylyqqa alýǵa shaqyramyz.
