Óńirlerdegi tártipsizdikterge qatysqan kúdiktiler elordada ustaldy

NUR-SULTAN. QazAqparat – Qańtar aıynyń basynla óńirlerde oryn laǵan tártipsizdikterge qatysqan kúdiktiler elordada ustaldy. Bul týraly Nur-Sultan qalalyq polıtsııa departamenti Jergilik polıtsııa qyzmeti basqarmasynyń bastyǵy Arman Aımaǵambetov aıtty, dep habarlaıdy QazAqparat tilshisi.

«Ózderińiz de biletindeı, qazirgi ýaqytta Nur-Sultan qalasynyń aýmaǵynda «Quqyqtyq tártip» jedel aldyn alý is-sharasy ótkizilip jatyr. Onyń aıasynda biz zańsyz aınalymnan atys qarýlaryn da tárkiledik», - dedi ol brıfıng barysynda BAQ ókilderiniń saýalyna oraı.

Osy rette ol qańtardyń basyndaǵy oqıǵalar kezinde elordada tártipsizdikterge jol berilmegendigin basa aıtty.

«Qoǵamdyq tártipti buzǵany úshin ustalǵandar boldy. Qazirgi ýaqytta sotqa deıingi tergeý amaldary júrgizilip jatyr», - dedi basqarma bastyǵy.

Sonymen qatar elordalyq departament ókili elimizdiń ózge óńirlerde oryn alǵan tártipsizdikterge qatysty degen kúdikpen Nur-Sultan qalasynda qolǵa túsken kúdiktilerdiń de bolǵandyǵyn atap ótti.

«Ózge óńirlerde oryn alǵan oqıǵalarǵa qatysqandar da ustaldy. Qazirgi ýaqytta Jambyl oblysynda jáne Almaty qalasynda oryn alǵan oqıǵalarǵa qatysqan 3 kúdikti qolǵa tústi. Atalǵan tulǵalardan urlanǵan zattar tabyldy. Keıbir faktilerge qatysty jedel qyzmetter keshendi jumystar júrgizdi. Urlanǵan telefondardy satylymǵa shyǵarý derekteri de bar. Qazirgi ýaqytta sotqa deıingi tergeý amaldary júrgizilip jatyr», - dedi Arman Aımaǵambetov.