Óńirlerdegi quzyrly organdar úshin memlekettik satyp alý rásimi ońtaılandyrylady

ASTANA. QazAqparat – Óńirlerdegi jergilikti organdar úshin júrgiziletin memlekettik satyp alý rásimderi jeńildeıdi. Ortalyq kommýnıkatsııalar qyzmetindegi brıfngte QR Ulttyq ekonomıka vıtse-mınıstri Baýyrjan Omarbekov osylaı málim etti, dep habarlaıdy QazAqparat tilshisi.

Onyń aıtýynsha, endi jergilikti jerdegi quzyrly organdar bir kózden somasy 2 myń aılyq eseptik kórsetkishten aspaıtyn qajettilikti satyp alýyna ruqsat beriledi.

«Memleket basshysynyń tapsyrmasy boıynsha mınıstrlik «QR jergilikti ózin-ózi basqarý týraly» Zań jobasyn ázirledi. Ol eldegi jergilikti ózin-ózi basqarýdy damytýdyń negizi bolýǵa tıis. Sondaı-aq, zań jobasynda bıýdjettiń IV deńgeıi úshin memlekettik satyp alý rásimderin ońaılatý normalary kózdelgen. Qarjy mınıstrligindegi áriptesterimiz bul máseleni zańǵa táýeldi aktiler deńgeıinde retteýdi jáne aýyl bıýdjeti úshin memlekettik satyp alýdy júzege asyrýdyń jekelegen qaǵıdalaryn ázirleýdi usynady. Oǵan saı, memlekettik satyp alýdyń kelesi túrleri qarastyrylady: bir kózden - 2 000 AEK (6,9 mln teńge) deıingi satyp alýlardy júzege asyrý, al 2 000 AEK-ten asqan jaǵdaıda konkýrstyq tártippen ótedi. Jalpy baǵa usynystaryn suratý 8 000 AEK-ke (27,6 mln teńge) deıingi sommany qamtýy tıis. Sondaı-aq, memlekettik satyp alýdy ótkizýdiń ózge de tásilderin ákim apparatynyń qaraýyna saqtaý usynylady», - dedi Baýyrjan Omarbekov.