Óńirlerdegi kómir baǵasy belgili boldy
ASTANA. QazAqparat - Búgin Úkimettiń selektorlyq rejimdegi otyrysynda QR Energetıka mınıstri Qanat Bozymbaev elimizdiń óńirlerinde kómirdiń naqty baǵalaryn atady, dep habarlaıdy QazAqparat.
«Oblystaǵy kómirdiń baǵasy ken ornymen aradaǵy qashyqtyq pen kómirdiń jylý bólý sıpattamasyna qaraı ózgerip otyrady. Máselen, Shubarkól ken ornynyń kómiri Qaraǵandy oblysynyń Nura aýdanynda 8 myń bolsa, Ońtústik Qazaqstan oblysynda 18 myń teńgege jetedi. Óndirýshi baǵasy tonnasyna 5 myń teńge. Maıkúben ken ornynyń kómiri Ekibastuz qalasynda 8 myń teńge bolsa, Ońtústik Qazaqstan oblysynda 16 myń teńgege jetedi. Al óndirýshi baǵasy tonnasyna 3200 teńge», - dedi mınıstr.
Onyń aıtýynsha, óndirýshiniń baǵasy 3650 teńgeni quraıtyn Qarajyra kómiri Semeıde 7 myń bolsa, Qostanaıda 15500 teńge jetip jyǵylady. Al óndirýshi baǵasy nebári 1680 teńgeni quraıtyn Bogatyr kómiri Pavlodar oblysynda 7 myńnan, al Qostanaı oblysynda 9700 teńgeden saýdalanýda.
«Jylý berý maýsymynda kómirdiń Qazaqstannyń óńirlerine kedergisiz jetkizilýin qamtamasyz etý úshin kómir tasý úshin qajetti vagondarmen qamtamasyz etýge baqylaýdy kúsheıtý, oblystardyń, Astana men Almaty qalalarynyń ákimderi kommýnaldyq-turmystyq qajettilik pen halyqqa kómirdiń jetkizilýine únemi monıtorıng jasaý qajet dep esepteımin», - dedi Bozymbaev.
