Óńirlerde ushaqtardy kúni-túni qabyldaý úshin jaǵdaı jasalmaǵan
ASTANA. QazAqparat - Óńirlerde ushaqtardy kúni-túni qabyldaý úshin jaǵdaı jasalmaǵan. Bul týraly búgin Úkimettiń selektorlyq rejımdegi otyrysynda QR Premer-Mınıstri Baqytjan Saǵyntaev aıtty, dep habarlaıdy QazAqparat.
«Barlyqtaryńyz da bilesizder, taıaýda ǵana qaıǵyly jaıt oryn aldy. Ekıpaj, dárigerler mert boldy. Osy qaıǵyly oqıǵa sanıtarlyq avıatsııa salasynda qordalanǵan problemalardyń bar ekendigin bildiredi», - dedi Úkimet basshysy.
Premer-Mınıstrdiń paıymynsha, elimizde eski ushaqtar paıdalanylýda jáne ushý qaýipsizdigi saqtalmaıdy.
«Óńirlerde áýe kemelerin táýlik boıy qabyldaý úshin jaǵdaı jasalmaǵan. Saldarynan joǵary bilikti mamandar men qatar aýyr naýqastardyń ómirine qater tónedi. Osyǵan baılanysty Densaýlyq saqtaý, Investıtsııalar jáne damý, Іshki ister mınıstrlikterine jáne múddeli memlekettik organdarǵa bul oqıǵany tyńǵylyqty tergeýdi tapsyramyn», - dedi Baqytjan Saǵyntaev.
Sonymen qatar ol elimizdegi sanıtarlyq avıatsııa parkine tekserý júrgizýdi, áýe kemelerimen tasymal jasaýǵa talaptardy kúsheıtýdi tapsyrdy.
