Óńirlerde turǵyn úı ınspektsııalaryn qurýdy jedeldetý qajet - A. Ótegenov
ASTANA. Qańtardyń 25-i. QazAqparat /Qanat Mámetqazyuly/ - Respýblıka óńirlerinde turǵyn úı ınspektsııalaryn qurýdy jedeldetý qajet. Búgin QR Parlamenti Májilisinde ótken Úkimet saǵatynda depýtat Amanqos Ótegenov osylaı málim etti,
dep habarlaıdy QazAqparat.
Jıyn barysynda depýtat A. Ótegenov, Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokınniń baıandamasyna toqtala otyryp, kóppáterli turǵyn úılerdegi az qamtylǵan otbasylarǵa memlekettik turǵyn úı kómegin kórsetýdegi negizgi problemalarǵa toqtalyp ótti. Onyń aıtýynsha, byltyrǵy jyly qurylys salasyndaǵy zańnamalarǵa engizilgen ózgeristerge sáıkes, turǵyn úı kómegi esebinen júrgiziletin ortaq múlikti jóndeýge arnalǵan shyǵystar smetasyn eń aldymen turǵyn úı ınspektsııasy bekitýi qajet eken. «Byltyr qabyldanǵan zańda ortaq múlikti paıdalanýdy tekserý tártibi, ondaı tekserýlerge qatysýshylardyń quqyqtary men mindetteri anyq ári naqty jazylǵan. Bundaı qyzmetterdi óńir ákimdikteri janynan qurylatyn turǵyn úı ınspektsııasy atqaratyny da «taıǵa tańba basqandaı» kórsetilgen. Biraq, qazirgi kúni bundaı turǵyn úı ınspektorlary tek Astana qalasynda ǵana bar eken», dedi A. Ótegenov. Osyǵan oraı, depýtat kóppáterli turǵyn úılerge qatysty memlekettik turǵyn úı kómegin berý úshin, aldymen turǵyn úı ınspektorlary bolýy tıistigin alǵa tarty. «Olarsyz memlekettik kómek ıgerilmeıdi. Sondyqtan da, óńir ákimderine jedel túrde turǵyn úı ınspektsııasyn qurýdy tapsyrý kerek», dedi ol.
