Óńirlerde saýda ústemesin tómendetý týraly 40 memorandýmǵa qol qoıyldy

ASTANA. QazAqparat - Jergilikti atqarýshy organdar iri saýda jelilerimen saýda ústemesin 10%-ǵa deıin tómendetý týraly memorandýmdar jasasady, dep habarlaıdy QazAqparat Saýda komıtetiniń baspasóz qyzmetine silteme jasap.

Esterińizge sala keteıik, Qazaqstan Respýblıkasynyń saýda jáne ıntegratsııa mınıstri Serik Jumanǵarın azyq-túlik qaýipsizdigin qamtamasyz etý jáne áleýmettik mańyzy bar azyq-túlik taýarlarynyń baǵasyn ustap turý aıasynda selektorlyq keńes ótkizdi, onda áleýmettik mańyzy bar ónimderge 10%-dan aspaıtyn saýda ústemesin saqtaý týraly memorandýmdar jasasý qajettiligi týraly másele qaraldy.

Qazirdiń ózinde Shymkent, Almaty qalalarynda, Qostanaı, Aqtóbe, Atyraý, Shyǵys Qazaqstan, Batys Qazaqstan, Abaı oblystarynda «Magným», «Smol», «Anvar», «Astyqjan» jáne t.b. iri saýda jelilerimen 40 memorandým jasalǵan. Bul shara Qazaqstannyń iri saýda jelilerinde áleýmettik mańyzy bar azyq-túlik ónimderiniń baǵasyn tómendetýge múmkindik beredi.

«Biz saýda jelileriniń reestrin jasaǵan bolatynbyz, búgingi tańda elimizde olardyń sany 109-ǵa jetip otyr jáne olardyń 1458 fılıaly bar. Biz árbir fılıaldy bilemiz, ákimdikter memorandýmdarǵa qol qoıý jumystaryn júrgizýde. Máselen, búginde 40 memorandýmǵa qol qoıyldy, qalǵandary kelisý satysynda», - dedi SIM Saýda komıtetiniń tóraǵasy Erjan Qazanbaev.

Sonymen qatar, Saýda komıteti negizgi azyq-túlik taýarlary baǵasynyń ósý dınamıkasynyń derekterin taldaýdyń durystyǵyn arttyrý úshin qoǵamdyq baqylaýdy engizgenin atap ótken jón: turǵyndardyń ÁMAT tizbesine kiretin ónimderge joǵary baǵaǵa ótinishterin qabyldaý úshin call-ortalyq quryldy. Shaǵymdar Facebook, Sauda_komiteti jáne sauda_inform Instagram áleýmettik jelilerindegi SIM akkaýnttary arqyly da qabyldanady.