Óńirlerde otbasy ınstıtýtyn nyǵaıtý máselelerin talqylaý bastaldy
Aǵymdaǵy jyldyń qańtar aıynda Memleket basshysy Qasym-Jomart Toqaev áıelder men balalardyń quqyqtaryn qorǵaý, otbasyndaǵy zorlyq-zombylyqqa jol bermeý jónindegi josparlanǵan sharalardy jurtshylyqpen keńinen talqylaýdy qamtamasyz etýdi tapsyrdy.
«Tapsyrmany oryndaý úshin el óńirlerinde halyqpen kezdesýler uıymdastyryldy, onda jurtshylyq pen memlekettik organdardyń ókilderimen otbasy ınstıtýtyn nyǵaıtýǵa, otbasylyq qundylyqtardy saqtaýǵa jáne otbasyndaǵy zorlyq-zombylyqtyń aldyn alýǵa baǵyttalǵan zańnamalyq normalardy jetildirý qajettiligi týraly usynystar aıtyldy. Memleket basshysy atap ótkendeı, qazaqstandyq otbasylar men balalardyń ál - aýqatyn qamtamasyz etý, otbasy ınstıtýtyn nyǵaıtý memlekettik saıasattyń mańyzdy basymdyqtarynyń biri bolyp tabylady jáne elimizde qabyldanyp jatqan zańdardyń qoǵamnyń, elimizdiń árbir turǵynynyń ıgiligi úshin jumys isteýine jaǵdaı jasaý biz úshin óte mańyzdy « , - dep atap ótti kezdesýdi ashqan Lazzat Ramazanova.
Qatysýshylar otbasy, áıelder men balalardyń quqyqtaryn qorǵaý úshin barlyq múddeli memlekettik organdardy vedomstvoaralyq úılestirýdi, olardyń turmystyq zorlyq-zombylyqtyń júıeli aldyn alýǵa, ómirlik qıyn jaǵdaıǵa tap bolǵan azamattarǵa ýaqtyly kómek kórsetýge baǵyttalǵan qoǵamdyq uıymdarmen úılesimdi ózara is-qımylyn qamtamasyz etý qajettigin atap ótti.
Kezdesýde jańa zańnamalyq bastamalardy engizý kezinde otbasylyq qundylyqtardy esepke alý qajettiligi, balalardy tárbıeleýdegi ákelerdiń rólin arttyrý qajettiligi týraly máseleler kóterildi.
Úkimettik emes uıymdardyń kóshbasshylary men músheleri radıkaldy aǵymdardyń otbasy ınstıtýtyna áser etýine jol bermeý jáne problemalar týraly máseleni kóterdi.
Qoǵam belsendileri balalar men jastar arasynda otbasylyq qundylyqtardyń sabaqtastyǵyn qalyptastyrý protsesine ana men áke ınstıtýttarynyń bedelin arttyrý úshin qoǵamda qurmetke ıe aǵa býyn ókilderin tartýdy usyndy.
Aıtylǵan usynystardyń ishinde - kópbalaly otbasyndaǵy balalar men «Altyn alqa» jáne «Kúmis alqa» nagradalary bar analar úshin járdemaqylardy ulǵaıtý, bala kútimi boıynsha járdemaqylardy bala týýǵa baılanysty demalysta bolý merzimderine barabar tóleý merzimderin ulǵaıtý, kóp balaly otbasylar úshin turǵyn úı alý merzimin qysqartý bar.
Budan basqa, reprodýktıvti densaýlyq, erte júktilik máseleleri, sondaı-aq múmkindigi shekteýli balalary bar otbasylardyń máseleleri, memlekettik ońaltý ortalyqtaryn ashý qajettiligi kóterildi.
Buǵan deıin osyndaı kezdesý Jambyl oblysynda da ótken bolatyn. Munda zorlyq-zombylyqtyń aldyn alý máseleleri de talqylandy.
Kezdesýge qatysýshylar zorlyq-zombylyqtan zardap shekken áıelderge kómek kórsetý úshin árbir aýdan ortalyǵynda Otbasyn qoldaý ortalyqtaryn ashýdy usyndy.
Jambyl oblysynyń ákimi Berdibek Saparbaevpen kezdesýde Ulttyq komıssııa basshysy Lazzat Ramazanova áıelderdiń óńirdiń qoǵamdyq-saıası ómirine qatysý máselelerin talqylady.
Búginde óńirdegi memlekettik qyzmette áıelderdiń 40%-dan astamy jumys isteıdi, sondaı-aq jartysynan kóbi - kásipkerlik salasyndaǵy áıelder.
Ótkizilgen kezdesýlerge ulttyq jáne óńirlik komıssııanyń, qoǵamdyq keńestiń jáne ákimdikter bólimsheleriniń, úkimettik emes uıymdardyń, basqa da memlekettik organdardyń músheleri qatysty.
Kezdesý barysynda aıtylǵan usynystardy Áıelder isteri jáne otbasylyq-demografııalyq saıasat jónindegi ulttyq komıssııa óz ókilettigi sheńberinde qaraıdy.
