Óńirlerde órt týraly habarlaıtyn qurylǵylar qalaı ornatylyp jatyr
ASTANA. QazAqparat - Órt pen kómirqyshqyl gazy sekildi qaýipti faktorlardy anyqtaý quraldary Astana, Almaty, Shymkent qalalarynda, Aqtóbe, Aqmola, Qostanaı jáne Pavlodar oblystarynda belsendi túrde ornatylyp jatyr. Alaıda, bul baǵyttaǵy jumys Túrkistan men Jambyl oblystarynda múlde júrgizilmeı qalǵan, dep habarlaıdy QazAqparat tilshisi.
«Kóp balaly jáne az qamtylǵan otbasylar, zeınetkerler men múgedekter turatyn turǵyn úılerde avtonomdy órt dabyldary, ýly gaz datchıkteri men tabıǵı gaz sıgnalızatorlaryn ornatý jumystary jalǵasýda. Jyl basynan beri 2 434 datchık satyp alyndy. Onyń ishinde 1 501 ákimdikter esebinen, 933-i jeke kompanııalardyń esebinen alynǵan», - deıdi QR ІІM Tótenshe jaǵdaılar komıtetiniń tóraǵasy baspasóz máslıhatynda.
Komıtet tóraǵasynyń aıtýyna qaraǵanda, qaýipti faktorlardy anyqtaý quraldary Astana, Almaty, Shymkent qalalarynda, Aqtóbe, Aqmola, Qostanaı jáne Pavlodar oblystarynda belsendi túrde ornatylýda.
«Gazdandyrylǵan Almaty jáne Atyraý oblystarynda barlyq tıptegi datchıkterdi satyp alý jaǵdaılary birli-jarymdy (14 jáne 10) kezdesti. Al Jambyl jáne Túrkistan oblystarynda bul jumys múlde júrgizilgen joq. Men búgin ǵana atalǵan oblystardyń departament basshylarymen sóılestim. Olar ákimdiktermen bul jumysty júrgizip jatyr. Bul týraly oblys ákimderine habar berildi. Reaktsııa bar. Jumys atalmysh oblystarda qolǵa alynady degen oıdamyn», - deıdi Vladımır Bekker.
Eske sala ketsek, buǵan deıin Vladımır Bekker turǵyn úı sektorlarynda júrgizilip jatqan órttiń aldyn alý jumystary týraly aıtyp bergen bolatyn.
«Reıd barysynda turǵyndarǵa nusqaýlyq júrgiziledi. Peshti paıdalaný kezinde órt qaýipsizdiginiń negizgi talaptary, avarııalyq jaǵdaıdaǵy aqaýy bar elektr quraldaryn paıdalanýǵa jol bermeý, halyqtyń otty abaısyz paıdalanbaýy týraly jadynamalar men nusqaýlyqtar taratylady. Ókinishke qaraı, 31 myń úıdiń ıesi tekserý júrgizýden bas tartty. Júrgizilgen jumystyń qorytyndysy boıynsha halyqtyń áleýmettik toptaryna jatatyn úılerde órt qaýipsizdigi talaptaryn buzý jaǵdaılary týraly kómek kórsetý úshin jergilikti atqarýshy organdaryna, áleýmettik qorǵaý jáne bilim berý basqarmalaryna habardar etildi», - deıdi V.Bekker.
