Óńirlerde órt qaýipsizdigi datchıkterin ornatý jalǵasady
NUR-SULTAN. QazAqparat – QR Premer-Mınıstri Asqar Mamın Tótenshe jaǵdaılar mınıstrligi jańadan jobalanatyn kóppáterli turǵyn úılerdi avtomatty órt dabyly júıelerine baılanysty túzetýler daıyndaǵanyn aıtty, dep habarlaıdy QazAqparat tilshisi.
«Jergilikti atqarýshy organdar halyqtyń osal toptarynyń turǵyn úılerin datchıktermen óteýsiz negizde jaraqtandyrý jumysyn azamattyq qorǵaý, áleýmettik qorǵaý, bilim berý jáne polıtsııa organdaryn tarta otyryp júrgizýde. 2019 jyldan beri 100 myńnan astam datchık ornatyldy, olardyń der kezinde iske qosylýynyń arqasynda 70 adam aman qaldy», - delingen Úkimet basshysynyń depýtattyq saýalǵa bergen jaýabynda.
Tótenshe jaǵdaılar mınıstrligi aqparatyna sáıkes 2020 – 2021 jyldary jylytý kezeńinde áleýmettik jaǵynan osal azamattardyń úılerinde órt jáne qaza bolǵandar sany azaıǵany baıqaldy.
«Bul baǵattaǵy jumysty óńirlerdiń ákimdikteri jalǵastyrýda», - dedi A. Mamın.
Budan buryn habarlanǵandaı, Premer-Mınıstr Tótenshe jaǵdaılar mınıstrligi jańadan jobalanatyn kóppáterli turǵyn úılerdi avtomatty órt dabyly júıelerine baılanysty túzetýler daıyndaǵanyn aıtty.
Eske sala keteıik, Májilistiń jalpy otyrysynda depýtattar órt qaýipsizdigine baılanysty Úkimet basshysynyń atyna depýtattyq saýal joldaǵan bolatyn.
