Óńirlerde lańkestiktiń aldyn alý máseleleri boıynsha KMM-di qurý jumystaryn jalǵastyrý kerek - G. Ábdiqalyqova
ASTANA. QazAqparat - QR Úkimet basshysynyń orynbasary Gúlshara Ábdiqalyqova «Qaýyrt jeli-114» respýblıkalyq aqparattyq keńes ortalyǵyn halyqqa keńinen nasıhattaýdy tapsyrdy.
«Oblystardyń, Astana men Almaty qalalary ákimderimen birlesip dinı ekstremızmniń jáne lańkestiktiń aldyn alý máseleleri boıynsha kommýnaldyq memlekettik mekemelerdi qurý turǵysynda jumysty jalǵastyrý kerek. Bul jóninde arnaıy qaýlylar men qujattar qabyldandy», - dedi G. Ábdiqalyqova QR Din isteri agenttiginiń keńeıtilgen alqa májilisinde. Sonymen qatar vıtse-premer dinı destrýktıvti uıymdardyń árketinen zardap shekkenderge keńes berý, psıhologııalyq kómek kórsetý boıynsha «Qaýyrt jeli-114» respýblıkalyq aqparattyq keńes ortalyǵyn halyqqa keńinen nasıhattaý kerektigin jetkizdi. «Jalpy aldaǵy ýaqytta agenttiktiń qyzmeti Memleket basshysynyń din salasyna qoıǵan strategııalyq maqsattary men mindetteri sapaly oryndalýǵa baǵyttalýy tıis. Bul jóninde birigip jumys isteımiz dep oılaımyn», - dep túıdi Úkimet basshysynyń orynbasary.
