Óńirlerde qysqy sport túrlerin damytý kerek - Elsııar Qanaǵatov
ALMATY. QazAqparat - Almatyda Qazaqstan Respýblıkasynyń V qysqy Spartakıadasynyń ashylý saltanatyna arnalǵan baspasóz máslıhaty ótti, dep habarlaıdy QazAqparat tilshisi.
Baspasóz máslıhatyna Almaty qalasy sport basqarmasyny basshysy Rústem Baıseıtov, QR UOK sport dırektsııasynyń dırektory Elsııar Qanaǵatov jáne konkımen júgirýshiler, Jasóspirimder olımpıadasynyń kúmis júldegeri, QR chempıonattary, Kýboktarynyń birneshe dúrkin jeńimpazy, 2021 jylǵy Álem kýbogy kezeńiniń qola júldegeri Anvar Mýhamadeev, «Azııa balalary» jarystarynyń jeńimpazy, QR chempıonattary Kýboktarynyń birneshe dúrkin jeńimpazy Valerıı Klımenko men BAQ ókilderi qatysty.
Almaty qalasy sport basqarmasyny basshysy Rústem Baıseıtov Almaty qalasy úshin Qazaqstan Respýblıkasynyń qysqy spartakıadasyn ótkizý úlken mártebe ekenin aıtty.
«Bizdiń qalamyzǵa qysqy sport túrlerinen elimizdiń eń myqty sportshylary jınaldy. Jarysqa 16 oblys pen respýblıkalyq mańyzy bar 3 qalanyń atynan 1300-ge jýyq adamnan quralǵan qurama komandalar qatysýda. Spartakıada baǵdarlamasyna sporttyń 14 túri endi. Olar: bıatlon, kerlıng, konkımen júgirý, mánerlep syrǵanaý, short-trek, shaıbaly hokkeı (erler), shaıbaly hokkeı (áıelder), taý shańǵysy sporty, aralas shańǵy, shańǵymen sekirý, snoýbord, frıstaıl-mogýl, frıstaıl akrobatıka. Qalanyń barlyq sporttyq obektileri jarystardy óttkizýge jaramdy. Spartakıadanyń ashylý saltanaty búgin «Almaty Arena» sport saraıynda ótse, jabylý saltanaty 27 jeltoqsan kúni «Halyq Arena» sport saraıynda ótedi»,- dedi Rústem Baıseıtov.
Sondaı-aq, Almaty qalasy sport basqarmasy basshysynyń aıtýynsha, qysqy Sparatkıada qalanyń negizgi sport obektilerinde ótedi.
«Jarystar «Shymbulaq» taý-shańǵy kýrortynda, «Medeý» muz aıdynynda, «Almaty Arena», «Halyq Arena» sport saraılarynda, «Suńqar» halyqaralyq shańǵy tramlınder kesheni, «Balýan Sholaq» atyndaǵy sport saraıynda ótedi. Almatynyń qurama komandasynda 200-den astam sportshy bar. Almatylyqtar qysqy sporttyń barlyq túrlerinen qatysady. Olar barlyq daıyndyqtardan ótti. Árıne, biz endi sportshylarymyzdan joǵary nátıjelerdi kútemiz»,-dedi Rústem Baıseıtov.
QR UOK sport dırektsııasynyń dırektory Elsııar Qanaǵatovyń aıtýynsha, elimizdiń óńirlerinde qysqy sportty damytýǵa durys kóńil bólinbeı otyr.
«Qazirgi tańda elimizde qysqy sport túrlerin damytýǵa barlyq jaıdǵaı jasalǵanmen, árbir óńirde qysqy sport túrlerine arnalǵan jabyq sporttyq keshender az. Olar bizde eki qalada ǵana bar. Olar: Nur-Sultan men Almatyda. Mysaly, konkı sportyna baılanysty eshqandaı óńirde birde-bir jabyq sporttyq kesheni joq. Biz Qostanaı, Soltústik Qazaqstan, Aqmola, Qaraǵandy oblystarynan shyqqan konkı sportynyń jaqsy sportyshalaryn bilemiz, biraq, olardyń óz jerlerinde jabyq sporttyq keshenderi joq. Sondyqtan bul máseleni qolǵa alyp, oblystarda qysqy sport túrlerinen jabyq sporttyq keshenderdi kóbeıtý kerek dep oılaımyn. Jalpy, Almatyda búgin ótip jatqan Spartakıada óńirlerde qysqy sporttyń qanshalyqty damyp kele jatqanyn kórsetetin bolady»,- dedi Elsııar Qanaǵatov.
Jasóspirimder olımpıadasynyń kúmis júldegeri, QR chempıonattary, Kýboktarynyń birneshe dúrkin jeńimpazy, 2021 jylǵy Álem kýbogy kezeńiniń qola júldegeri Anvar Mýhamadeev elimizde qysqy sport túrleri damysa degen tilegin jetkizdi.
«Árıne, elimizde sport jaqsy damyp keledi. Biraq, budan da jaqsy damysa eken degim keledi. Sebebi, Qazaqstanda jazǵy sport túrleri jaqsy damyǵan, al qysqy sport túrleri dál solaı damyp kele jatyr dep aıta almaımyn. Degenmen, bizge qoldaý kórsetiledi, jaqsy nátıjelerimiz de bar. Meniń alǵashqy saıysym 22 jeltoqsan kúni bastalady. Men «Medeý» muz aıdynynda konkımen 500 jáne 5000 metrge júgiremin. Biz jarysqa jaqsy daıyndyqpen keldik. Aýa raıy jaqsy bolyp, jaqsy nátıje kórsetemiz dep oılaımyn»,- dedi sportshy.
Al «Azııa balalary» jarystarynyń jeńimpazy, QR chempıonattary Kýboktarynyń birneshe dúrkin jeńimpazy Valerıı Klımenko sporttaǵy jetistikterine kóp jattyǵýlar arqyly jetkenin aıtty.
«Bul Spartakıadaǵa jaqsy daıyndyqpen keldik. Bizdiń oqý-jattyǵý jıyndarynyń ótýine qoldaý jasaldy. Bul meniń alǵashqy Spartakıadam. Maǵan munda bári qyzyq, bári jańa. Men 23-25 jeltoqsan kúnderi «Balýan Sholaq» sport saraıynda qysqa qashyqtyqta konkımen júgiremin»,-dedi Valerıı.
Esterińizge salsaq, 8-27 jeltoqsan aralyǵynda Almatyda Qazaqstan Respýblıkasynyń V qysqy Spartakıadasy ótýde. Jarysty uıymdastyrýshylar Qazaqstan Respýblıkasynyń Mádenıet jáne sport mınıstrligi men Almaty qalasynyń sport basqarmasy.
