Óńirlerde ınvestorlarǵa arnalǵan front-keńseler ashylady

NUR-SULTAN. QazAqparat - Óńirlerde ınvestorlar úshin front-keńseler ashylatyn bolady. Bul týraly QR Syrtqy ister mınıstriniń orynbasary Ermek Kósherbaev aıtty, dep habarlaıdy QazAqparat tilshisi.

«Negizinde memlekette úı deńgeıli ekojúıe qurylǵan. Syrtqy baılanysta bizdiń shetelde otyrǵan elshilikterimiz, konsýldyqtarymyz, ortalyq deńgeıde SІM jáne basqa memorgandar, sondaı-aq el ishinde ákimdikter, óńirlik mekemeler jumys isteıdi. Ortalyq deńgeıde AHQO múmkindikterin paıdalanyp otyrmyz. Al alday ýaqytta óńirlik deńgeıde de osyndaı front-keńselerdi qurý qajet bolyp otyr. Ár ákimdikte burynnan beri ınvestorlarǵa qyzmet kórsetý ortalyqtary bolatyn. Biraq, bul ortalyqtar keńesshi retinde jumys isteıtin. Al biz ınvestıtsııalyq jobalardy iske asyratyn bolsaq, ol jumystar jergilikti deńgeıde atqarylatynyn eskerý kerek», - deıdi E.Kósherbaev Úkimettiń baspasóz ortalyǵynda.

Mınıstr orynbasarynyń aıtýyna qaraǵanda, óńirlerdegi front-keńselerge barǵan kezde ınvestorlar ózin qyzyqtyrǵan barlyq suraqtarǵa jaýap alyp, ózekti máselelerin sheshe alady.

«Investorlar óziniń máselelerin sol mekemelermen birge sheshpek. Investorlarǵa jaýapty mekemelerdiń bárin aralaý úshin ýaqyt qajet. Sondyqtan, oblys ákimderimen, ınvestorlarmen aqyldasyp, osyndaı sheshimge keldik», - deıdi ol.

Eske sala ketsek, buǵan deıin elimizde Premer-Mınıstr Asqar Mamınnyń tóraǵalyǵymen elimizde ınvestıtsııalar tartý jónindegi úılestirý keńesi qurylǵanyn habarlaǵan edik.

Óz kezeginde Syrtqy ister mınıstri Beıbit Atamqulov jańadan qurylǵan keńeske qandaı ókilettikter beriletinin habarlaǵan edi.