Óńirlerde ımmýnoprofılaktıka boıynsha túsindirý jumystaryn kúsheıtý qajet – mınıstr
Bul týraly búgin QR Densaýlyq saqtaý mınıstrliginiń keńeıtilgen alqa otyrysynda vedomstvo basshysy Alekseı Tsoı aıtty, dep habarlaıdy QazAqparat tilshisi.
Onyń aıtýynsha, E-gov mobile «Vaktsınatsııa» jáne «Tsıfrlyq qujattar» qyzmetindegi koronavırýsqa qarsy vaktsınatsııa pasporty arqyly egilgenderdiń esebin júrgizý jáne ımmýndyq jaǵdaıdy baqylaý josparlanýda. Bul vaktsınatsııa kólemin jáne aýrýdyń boljamyn josparlaýǵa kómektesedi. Vaktsınatsııanyń qolda bar nátıjelerin eskere otyryp, osy jyldyń ekinshi jartyjyldyǵyna deıin epıdemıologııalyq jaǵdaıǵa boljam jasaldy.
«Búkil álem vaktsınatsııa ǵana qalypty ómirge karantınsiz oralýǵa múmkindik beretinin túsindi. Osyǵan baılanysty óńirler ımmýnoprofılaktıka boıynsha halyqqa aqparattyq-túsindirý jumystaryn kúsheıtýi qajet», - dedi Alekseı Tsoı.
Mınıstr optımıstik jáne shynaıy boljamǵa sáıkes jappaı maska rejımi, sondaı-aq áleýmettik araqashyqtyq saqtaý nátıjesinde eldegi epıdemıologııalyq jaǵdaı turaqtalatyndyǵyn jáne qatań karantındik shekteýge vaktsına ǵana balama bolatynyn atap ótti.
Esterińizge sala keteıik, Qazaqstanda koronavırýs ınfektsııasyna qarsy jappaı vaktsınalaý Memleket basshysynyń tapsyrmasy boıynsha 2021 jylǵy 1 aqpanda bastaldy.