Óńirlerde halyqqa josparly medıtsınalyq kómek kórsetý isi jandandy – QR DSM

NUR-SULTAN. QazAqparat - Elimizde Medıtsınalyq saqtandyrý qory arqyly halyqqa tegin qyzmet kórsetetin 626 mekeme bar. Bul týraly QR Densaýlyq saqtaý mınıstrliginiń resmı ókili Baǵdat Qojahmetov aıtty, dep habarlaıdy QazAqparat tilshisi.

«Ózderińizge málim, koronavırýs indeti órshigen kezde medıtsınalyq mekemelerdiń josparly qabyldaýlary toqtatylǵan bolatyn. Degenmen, ahýaldyń turaqtalýyna baılanysty Qazaqstanda 1 tamyzdan bastap josparly medıtsınalyq kómek qaıtadan jandandy. Birinshi kezekte respýblıkalyq deńgeıdegi mamandandyrylǵan klınıkalarǵa túrli aýrýmen kelgen naýqastar jatqyzylady», - dedi ol Ortalyq kommýnıkatsııalar qyzmetindegi brıfıng barysynda.

Resmı ókildiń aıtýynsha, elimizde Medıtsınalyq saqtandyrý qory arqyly halyqqa tegin qyzmet kórsetetin 626 mekeme bar. Ár oblystaǵy kórsetkish ártúrli. Mysaly, Almaty qalasynda 67, Almaty oblysynda 50, Shyǵys Qazaqstanda 54 medıtsınalyq uıym josparly qabyldaýǵa kóshti.