Óńirlerde gazǵa kóterme saýdadaǵy shekti baǵalar óspeıdi

NUR-SULTAN. QazAqparat – Óńirler úshin taýarlyq gazǵa shekti kóterme baǵalardy aǵymdaǵy deńgeıde saqtaý týraly sheshim qabyldandy. Bul týraly QR Energetıka mınıstri Nurlan Noǵaev halyq aldynda esep berý kezdesýinde aıtty, dep habarlaıdy QazAqparat tilshisi.

«Halyqqa, ónerkásiptik tutynýshylar men Qazaqstan Respýblıkasynyń kásipkerlerine qoldaý kórsetý úshin QR Energetıka mınıstrligi taýarlyq gazǵa shekti kóterme baǵalardyń ósýine jol bermeý boıynsha jumystar júrgizdi. Óńirler úshin taýarlyq gazǵa shekti kóterme baǵalardy aǵymdaǵy deńgeıde saqtaý týraly sheshim qabyldandy», - deıdi QR Energetıka mınıstri Nurlan Noǵaev.

Onyń aıtýynsha, 2019 jylǵy 1 qańtardan bastap mınıstrlik taýarlyq gazǵa shekti kóterme saýda baǵalaryn óńirlerde 3,8-den 17,5% sheginde tómendetti.

«Bul elimizdiń barlyq gazdandyrylǵan óńirlerinde elektr energııasy men jylýǵa túpkilikti baǵany tómendetýge múmkindik berdi. Mınıstrlik bekitken taýarlyq gazǵa shekti kóterme saýda baǵasy 2019 jylǵy 1 shilde – 2020 jylǵy 30 maýsym aralyǵynda da aǵymdaǵy deńgeıde saqtaldy», - deıdi ol.