Óńirlerde dárigerler tapshylyǵyn sheshýge qatysty usynystar aıtyldy - Parlament
NUR-SULTAN. QazAqparat – Parlament Májilisiniń jalpy otyrysynda depýtat Gúldara Nurymova elimizdiń qaı óńirlerinde dárigerler tapshy ekenin aıtty, dep habarlaıdy QazAqparat tilshisi.
«Qazaqstan Respýblıkasynyń Prezıdenti Q.K.Toqaevtyń 2020 jylǵy 1 qyrkúıektegi halyqqa Joldaýynyń basty baǵyttarynyń biri densaýlyq saqtaý júıesin, atap aıtqanda, sapaly jáne qoljetimdi medıtsınany damytý bolyp tabylady. Ásirese, pandemııadan keıin, densaýlyq saqtaý salasyn jetildirýdiń mańyzdylyǵy artyp otyr. Sonyń biri - dárigerlerdiń jetispeýshiligi. Bul halyqqa kórsetiletin medıtsınalyq kómektiń sapasyna tikeleı áser etedi. Resmı málimetterge sáıkes, densaýlyq saqtaý júıesindegi medıtsına qyzmetkerleriniń sany 253 883 adamdy qurasa, onyń 74 046-sy dárigerler, 180 myńǵa jýyǵy orta medıtsınalyq qyzmetkerler», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń aıtýynsha, 2021 jylǵy 1 qańtardaǵy derekter boıynsha medıtsına salasynda kadr tapshylyǵy 4 662 dárigerdi qurady.
«Óńirler boıynsha kadrlardyń asa jetispeýshiligi Qaraǵandy, Almaty, Batys Qazaqstan, Aqmola, Qostanaı, Shyǵys Qazaqstan, sondaı-aq Jambyl, Atyraý, Túrkistan oblystarynda baıqaldy.
«Dárigerlerdiń tapshylyǵy oqý merziminiń uzartylýyna, qalalar men monoqalalarda jas mamandardy qoldaý mehanızminiń joqtyǵyna baılanysty, ásirese, medıtsınalyq joǵary oqý oryndary joq óńirlerde sezilip otyr», - dedi Gúldara Nurymova.
«Ózgerister joly: Ár azamatqa laıyqty ómir!» atty «Nur Otan» partııasynyń 2025 jylǵa deıingi saılaýaldy baǵdarlamasy Jol kartasynyń oryndalýyna sáıkes, medıtsınalyq joǵary oqý oryndaryna granttar sanyn tıisinshe 2021 jylǵy 4685-ten 2025 jyly 5185-ke deıin ulǵaıtý kózdelip otyr. Granttar sanyn josparly ulǵaıtý elimizdegi medıtsına kadrlarynyń sanyn arttyryp qana qoımaı, medıtsına mekemeleriniń mamandarǵa degen qajettiligin qamtıdy», - dedi depýtat.
Joǵaryda aıtylǵandardyń negizinde ol birqatar kelesi máselelerdi qarastyrýdy suraıdy:
1. «2020-2025 jyldarǵa arnalǵan óńirlerdi damytýdyń memlekettik baǵdarlamasyna» tolyqtyrýlar engizý arqyly monoqalalardaǵy jas mamandardy aýyldardaǵy jas mamandarmen teńdeı áleýmettik kómekpen jáne turǵyn úımen qamtamasyz etý.
2. Medıtsınalyq kadrlar jetispeıtin aımaqtardan kelgen abıtýrıentter úshin medıtsınalyq bilim berý mekemelerinde oqýǵa arnalǵan granttar sanyn ulǵaıtý boıynsha kvotalardy ázirleý.
3. Dárigerlerdiń tapshylyǵyn eskere otyryp, QR Bilim jáne ǵylym mınıstrliginiń tarapynan medıtsınalyq JOO-larǵa granttar sanyn kóbeıtý.
4. Jas mamandardy bólý jónindegi komıssııa óńirlerdiń kadrlarǵa qajettiligin eskerýi kerek.
